गुम्हेस्यां नेवाः ध्वाँय् दयेकल

सुरेश

थ्वहे वइगु पुसं घोषणा यायेत्यंगु नेवाः स्वायत्त प्रदेशया मंकाः नेवाः ध्वाँय् आः नकतिनि तयार जूगु दु। नेवाः स्वायत्त राज्य मंकाः संघर्ष समितिया पहलय् तयार याःगु उगु हे ध्वाँय् ब्वयेकाः वकुन्हु नेवाः स्वायत्त राज्य खडा जूगु घोषणा यायेगु तयारी जोडतोडं जुयाच्वंगु दु। पलेस्वांया च्याहः दुने लुयाच्वंगु जाज्वल्यमान नगुया उगु ध्वाँय्यात आवंलि सकलें नेवाःतय्सं थःपिनि मंकाः ध्वाँय्या रुपय् ग्रहण यायेगु ग्वसाः दयेकातःगु दु ।

नेवाःतय्सं थुलि महत्व व सम्मान बियाः नालेत्यंगु थ्व ध्वाँय्या सर्जकं चाहिं थःगु ध्वाँय्यात कयाः थ्व इलय् छु बिचाः यानाच्वन थें ?

थ्व ध्वाँय्या डिजायन यानादीम्ह कलाकार खः भाजु रामकृष्ण नकर्मी। 'सन्ध्या टाइम्स' य् थुकिया बारे पिहां वःगु विज्ञापन स्वयाः पासापिंसं च्वयाः बिउ धकाः घ्वात्तुघ्वाःगुलिं जक वय्कलं उकिया डिजायन दयेकाः बिउगु जुयाच्वन। थःगु डिजायनयात स्वीकार हे याइ धइगु आशा नं वय्कःयाके मदुगु लानाच्वन। तर स्वीकार जूबलय् वय्कःयात ताल, 'ओहो, बिचाः हे मयानागु ज्या जुल ।'

वय्कलं ध्वाँय्या डिजायन नापं उकी च्वंगु च्याहःया अर्थ छुं नं भिंगु ज्या शुरु यायेबलय् तइबलय् अष्टमंगल अथवा अष्टमातृका, उकिया दुने च्वंगु रिंगचाःया अर्थ नेवाःतय्त छप्पँ यायेगुया प्रतिक व अनं नं दुने च्वंगु नगुया अर्थ लुयाच्वंगु न्हूगु नेपाः धइगु अर्थ छ्यानाः च्वयाः बियादीगु खः। ग्वसाः खलकं उकियात वहे रुपय् स्वीकार याःगुलिं वय्कः अतिकं हर्षित जुयादी ।

दँय्दसं नेपाल संवत्या न्हूदँ हनीबलय् नेपालभाषा मंकाः खलकं नेपाल संवत्या प्रवर्तक शंखधर साख्वाःया किपा पिकायेगु याइ। शंखधर साख्वाःया उगु किपा च्वयादीम्ह नं वय्कः हे खः। भाजु रामकृष्णं थनिं नीन्यादँ ति न्ह्यः मल्ल के. सुन्दरया इनाप कथं उगु किपा च्वयादीगु खः। किपा च्वयेत वय्कः न्हापां पशुपतिइ वनाः भ्वँतय् शंखधरया मूर्तिया स्केच च्वया हल। अले छेँय् च्वनाः उकियात तपाःगु किपाया रुप बिल। लिपा वय्कःया किपां हे शंखधरया आधिकारिक किपाया मान्यता कया वन ।

अथे हे वय्कलं दँय्दसं न्हूदँबलय् थाय्मरु त्वालय् थीथी भासं 'न्हूदँया भिंतुना' धकाः च्वयाः तया तइगु बोर्ड नं वय्कलं हे च्वयादीगु खः ।

दकलय् ला वय्कलं पञ्चायतकालय् पद्मरत्न तुलाधरया चुनाव क्याम्पेनय् सामेल जुयाः आपालं हे पोट्रेट नं च्वयादिल ।

चित्र च्वयेगु ज्याय् मचांनिसें हे वय्कःया ल्हाः ज्वः। वय्कःया अबु श्यामकृष्ण नकर्मी नं साइनबोर्ड च्वयेगु ज्या याइम्ह। अबुया ज्यापाखें हे वय्कलं चित्र च्वये सयेकादिल। लिपा केके कर्माचार्ययाथाय् वनाः चित्र च्वये सयेकादिल। अन एकाराम सिं, उत्तम श्रेष्ठपिं नं चित्र च्वये सयेकः वःगु जुयाच्वन।
चित्रय् ल्हाः ज्वःम्ह खःसां रामकृष्ण थौंकन्हय् थथे सार्वजनिक कथंया चित्रकारिताय् धाःसा मदु। उकिया पलेसा वय्कः थौंकन्हय् पिने निर्यात याइगु नेपाली कापतय् डिजायन यायेगु ज्याय् व्यस्त जुयाच्वनादीगु दु ।

२०१७ सालय् येँया थाय्मरु त्वालय् जन्म जूम्ह नकर्मी प्रतिभाशाली खयां नं पासापिनि दथुइ भ्याः हे घमण्ड मदुम्ह सरल व्यक्ति कथं परिचित जुयादी ।

More Stories Like this