फोरमय् ध्यबा इनाच्वन
गच्छदारयात अध्यक्ष यादवया द्वपं
सरकार त्वःतेगु कि मत्वःतेगु धकाः उकुन्हुं निसें ताःहाकः विवाद जुयाच्वंगु मधेशी जनअधिकार फोरम दुने थौंकन्हय् कार्यकर्तायात ल्हातय् कायेगु लागिं फोरमया संसदीय दलया नेता विजय गच्छेदारं ध्यबा बियाः समेत पार्टीयात भ्रष्ट यानाच्वंगु द्वपं स्वयम् उगु हे पार्टीया अध्यक्ष उपेन्द्र यादवं धायेगु यानाच्वंगु खँ सीदुगु दु ।
सूत्रतय्सं धाः कथं परराष्ट्रमन्त्री समेत जुयाच्वंम्ह भाजु यादवं थौंकन्हय् थः सतीिपं मनूत नापलात कि धायेगु यानाच्वंगु दु 'जेपी वगच्छदारं पार्टी स्यंकल ।'
यादवया कथं भौतिक योजना मन्त्री जुयाच्वंम्ह विजय गच्छदारं ठेकेदारतपाखें लाखौं दां कयाः कार्यकर्तातय्त इनेगु यानाच्वंगु दु । थुकिं यानाः फोरमया कार्यकर्ता धमाधमभ्रष्ट जुजुं वनाच्वंगु द्वपं नं उपेन्द्र यादवं बीगु यानाच्वंगु दु ।
थौंकन्हय् फोरम दुने सरकार त्वःतेमाः धइगु दवाव बियाः अध्यक्ष यादवयात काकेगु ज्याय् गच्छदार व जेपी गुप्तापिं दकलय् सकि्रय जुयाच्वंगुदु । उमिसं फुसा यादवयात अध्यक्ष पदं हे हटे यायेगु कुतः यानाच्वंगु खँ समेत सूत्रं धाःगु दु । उकुन्हु विराटनगरय् विजय गच्छदार मू पाहां वनेत्यंगु फोरमया हे छगू ज्याझ्वः स्यंकेगु लागिं यादव पुचलं विराटनगर बन्द ज्याझ्वः घोषणा याःगु द्वपं नं वःगु दु ।
थ्वहे झ्वलय् थःगु पार्टी दुने पिहां वयाच्वंगु विवाद व उकिं सरकारयात लाकाच्वंगु लिच्वः बारे सहलह यायेत परराष्ट्र मन्त्री यादव थौं सुथय् प्रधानमन्त्री नापलायेगु लागिं वालुवाटार वंगु दु । थुकियात नियमित भेट धाःगु दु ।
