शान्ति सम्झौता जूगु स्वदँ पूवन

झिदँ ता:हाक:गु सशस्त्र द्वन्द्व क्वचाःगु घोषणा सहित शान्ति सम्झौता जूगु थौं स्वदँ पूवंगु दु । स्वदँ न्ह्यः थौंया हे न्हि कुन्हु न्हय्गु दलया पाखें तत्कालिन प्रधानमन्त्री गिरिजाप्रसाद कोइराला व तत्कालिन नेकपा (माओवादी) पाखें अध्यक्ष पुष्पकमल दाहाल 'प्रचण्डं' हस्ताक्षर यानादीगु खः । २०६३ मंसिर ५ गते जूगु थुगु सम्झौतां २०५२ साल निसें न्ह्याःगु माओवादीया सशस्त्र युद्ध क्क्चाःगु घोषणा याःगु खः ।

तत्कालिन जुजु ज्ञानेन्द्रया शाही सरकार विरुद्ध मंकाः आन्दोलन यायेत न्हय्गू दल व माओवादी दथुइ दिल्ली जूगु झिंनिगू बुँदे सम्झौता लिपाःया झिगुन्हूया आन्दोलन पाखें लोकतन्त्र पलिस्था जुइधुंकाः राज्य व विद्रोही पक्ष दथुइ थुगु सम्झौता जूगु खः ।

थ्वहे सम्झौता कथं अन्तरिम संविधान जारी यानाः देशय् न्हापांगु खुशी संविधान सभाया चुनाव, राजतन्त्रया अन्त्यया घोषणा, संघीय लोकतान्त्रिक गणतन्त्र नेपाःया पलिस्था जुल ।

तर, थौं विस्तृत शान्ति सम्झौता जूगु स्वदँ पुलेधुंकाः नं थुकीया मू कार्यसूची कथंया मूमू ज्यात जुइफुगु मदुनी । शान्ति प्रकृया पुवंकेत माओवादी लडाकूतय् पुनःस्थापना, न्हूगु संविधान च्वयेगु, द्वन्द्वया ईलय् बेपत्ता जुपिनि मालेज्या व पीडित पक्षयात न्याय बीगू प्रमुख ज्याखँ प्रतिया प्रतिबद्धता अलपत्र जूगु दु ।

वर्तमान अवस्थाय् दलत दथुइ अप्वयावंगु दुरु व राजनीतिक गतिरोधया कारणं शान्ति सम्झौतायात अझ अन्यौलय् घ्वान्छ्वःगु दु । स्वदँ न्ह्यः शान्ति सम्झौता जूगु ईलय् तत्कालिन प्रम कोइराला व माओवादी अध्यक्षं सहमति यानाः झी ताः ई तक न्ह्या वनेमानीगु खँ धाःसां थौं निम्ह नेतातय्सं हस्ताक्षर याःगु सम्झौता व धयादीगु धापू कथं राष्ट्रिय सहमति, सहकार्य व एकताया आधाय् राजनीतिक दलत न्ह्या वनेफुगु मदु ।

थ्वहे कारणं जनताया नुगःलय् अनिश्चितता अप्वःगु दु । सम्झौता कथं प्राथमिक खँत हे पूमवंगुलिं न्हूगु संविधान जारी यानाः देययात आर्थिक, सामाजिक व सांस्कृतिक रुपान्तरण व प्राप्त उपलब्धि संस्थागत यायेगु थंज्याःगु शान्ति सम्झौताय् न्ह्यथंनातःगु खँ पूवंकेत नेपाःमितय्सं अझ ता: ई पिमानिगु जूगु दु ।

थौं राजनीति अत्यन्त गम्भीर अवस्थाय् लानाच्वंगुलिं शान्ति सम्झौता जूगु न्हि कुन्हु नेतातय्सं न्ववागू खँ व शान्ति सम्झौताय् न्ह्यथंनात कथं राष्ट्रिय सहमति, सहकार्य व एकताया माध्यमं स्यनाच्वंगु राजनीतिक अवस्थायात गति बीत दक्वं दलया नेता गम्भीर जुइमाःगु दु । नापं जनतां ताः ई निसें पियाच्वंगु शान्ति प्रकृया पूवंकेगु, माओवादी लडाकू समायोजन व संविधान निर्माण यायेगु ज्या ईलय् हे जारी यायेमाःगु हाथ्या दलतय्सं गम्भीर जुयाः थुइकेमाःगु दु ।

More Stories Like this