आः तक ३०० बुँदाय् हस्ताक्षर

संविधानसभायात सदन दयेका बिल: तुलाधर

येँ (सन्ध्या टाइम्स)/तत्कालिन न्हय्गू दलया सरकार व विद्रोही माओवादी दथुइ जूगु वृहत शान्ति सम्झौताया छुं हे बुँदा कार्यान्वयन मजूगु खँ तत्कालिन सरकार-विद्रोही वार्ताया सहजकर्ता मध्ये छम्ह भाजु पद्मरत्न तुलाधरं धयादीगु दु। उगु शान्ति सम्झौता जूगु थौं स्वदँ क्यंगु लसताय् 'सन्ध्या टाइम्स'लिसे खँ ल्हासें भाजु तुलाधरं धयादीगु खः ।

भाजु तुलाधरं धयादिल, 'शान्ति सम्झौताय् ला १२ बुँदा जक दु। तर सरकारं माओवादी बाहेक जनजाति, मधेशी, थीथी जातीय पुचःतलिसे याःगु फुक्क सम्झौता छथाय् तयेबलय् ३०० स्वयां अप्वः बुँदा थ्यनेधुंकल तर सरकारं उकी मध्ये छगू हे बुँदा कार्यान्वयन याःगु मखुनि ।'

राजनीतिक पार्टीतय्सं संविधानसभाया चुनाव ल्वाःगु खः तर चुनाव त्यायेधुंकाः धाःसा संविधानसभायात पूरा हे सदन दयेका बिउगु द्वपं नं वय्कलं बियादिल। वय्कलं धयादिल, 'पार्टीतय्सं सदनया चुनाव ल्वाःगु मखु। सदन धइगु थ्व संविधानसभाया छगू चीधंगु अंग जक खः ।'

अन्तरिम संविधानय् हरेक खँ सहमतिया लिधंसाय् यायेगु धकाः च्वयातःगु दुसां आः पार्टीतय् दथुइ सरकार दयेकेगु खःसा ३०१ संख्या थ्यंकि धकाः हाथ्या बियाच्वंगुलिं संविधानसभायात पार्टीतय्सं मुक्कं हे सदन दयेकाः हानं पुलांगु हे स्थितिइ लिहां वंगु खँ नं वय्कलं कनादिल ।

थौंकन्हय् जुयाच्वंगु राजनीतिक पार्टीतय् बैठकय् पिनेयाम्ह छम्ह हे सहजकर्ता मदुगु कारणं उमि दथुइ छु खँ जुल, छु खँय् सहमति कायम मजुल धकाः जनतां छुं हे सीके मफुगु व थुकिं यानाः जनताया सूचनाया हक तकं हनन जूगु द्वपं नं वय्कलं बियादिल ।

वय्कलं धयादिल, 'देशय् शान्ति प्रक्रिया शुरु जुल ला धाल, तर शान्तिइ गय् यानाः वनेगु धइगु प्रक्रिया धाःसा थुकी मदु। थ्व छगू प्रक्रिया हे मदुगु शान्ति प्रक्रिया खः ।'

शान्ति सम्झौता जूगु स्वदँ क्यंगु थ्व इलय् हरेक राजनीतिक पार्टीतय्सं सम्झौता बांलाक लागू मजू धकाः धाःसां थ्व लागू मजूगया दोष धाःसा छगुलिं मेगुयात बीगु यानाच्वंगु दु। अबलय् शान्ति प्रक्रियाय् वनेत तःधंगु भूमिका म्हितादीम्ह तत्कालि गृह मन्त्री कृष्णप्रसाद सिटौलां नं माओवादीतय्सं आः वयाः शान्ति सम्झौता कार्यान्वयन याकेत पंगः थनाच्वंगु द्वपं बियादीगु दु ।