सरकार व अनमिनया ख्वाउँया वंगु स्वापू

ख्वाउँया वनाच्वंगु नेपाः सरकार व अनमिनया स्वापू भविष्यय् वनाः गुकथं विकसित जू वनी धाये फइगु अवस्था मदु। खास यानाः अनमिनपाखें बिउगु प्रतिवेदनया लिधंसाय् संयुक्त राष्ट्र संघया महासचिव वान की मुनं नेपालय् वर्तमान सन्दर्भय् राष्ट्रिय सरकारया आवश्यकता दु धकाः बिउगु बिचाःयात कयाः माधव नेपालया सरकार तसकं तम्वःगु दु।
सरकारपाखें छगू विज्ञप्ति हे पिकयाः राष्ट्र संघं नेपाःया आन्तरिक मामिलाय् हस्तक्षेप यात धकाः छगू कथं भर्त्सना हे याःगु खः ।

उखे राष्ट्र संघया हे पहलय् जूगु शान्ति सम्झौतायात आः नेपालं पालना याये म्वाःल धइगु अभिव्यक्ति स्वयम सरकारय् दुपिं मन्त्रीतय्सं हे बियाच्वंगु दु। थुकिं यानाः आः अनमिनं नं नेपालय् थःपिं धाथें च्वनेमाःगु खः लाकि मखु धकाः पुनर्विचार यायेमाःगु अवस्था वया बिउगु दु। शायद वहे कारणं जुइमाः, आः नकतिनि प्रम माधव नेपालयात नापलानाः अनमिन प्रमुख करिना लेनग्रेनं अनमिन बारे नेपाः सरकारया आधिकारिक धापू छु खः स्पष्ट यायेमाल धकाः माग यानादीगु दु। खतुं नेपालय् सरकारया हे इनाप कथं राष्ट्र संघ दुहां वःगु खः। आः सरकारय् दुपिं हे मन्त्रीतय्सं अनमिन व थुकिया भूमिकायात कयाः नागःतुगः याना हसेंलि अनमिनं उकी पुनर्विचार याइगु स्वाभाविक खः। अथे धकाः नेपालय् अनमिनया भूमिका पूर्ण रुपं स्वच्छ जू धाये फुगु अवस्था मदु। कमी कमजोरी अनमिनपाखें नं जूगु दु। तर थुकिया मूल्यांकन गुगुं नं पार्टी वा सरकारं पूर्वाग्रही जुयाः यायेगु धाःसा पाय्छि मखु। अनमिन बारे बिचाः दयेकेगु ज्या नं फुक्क पार्टीया मंकाः सहमतिइ जुइमाः ।

More Stories Like this