कार्यतालिकाय् न्हय्क्वःगु संशोधन

संविधान च्वयेगु सम्बन्धी संविधानसभाया कार्यसूचीइ म्हिगः न्हय्क्वःगु संशोधन जुल। राजनीतिक पार्टीतय्गु मेमेगु विषयया कचवंया कारणं संविधान च्वयेगु ज्याय् वयाच्वंगु अवरोधं यानाः कार्यतालिकाय् थथे तःक्वःमछि संशोधन याये मालाच्वंगु खः। कार्यतालिकाय् जुयाच्वंगु थ्व संशोधनपाखें आः देशय् संविधान च्वयेगु ज्या जुइ मखुत लाकि धकाः पिहां वयाच्वंगु आशंकायात थप उर्जा बिउगु दु।
संविधानसभां गठन यानातःगु थीथी समितित मध्ये अधिकांश समितिं थःत बियातःगु ई पुलेधुंकाः तक नं थःपिंसं तयार यायेमाःगु मस्यौदा तयार याये फुगु मदुनि। अथे जूगुया मू कारण उगु समितितय्त तःधंगु राजनीतिक पार्टीतय्सं बुझे यायेमाःगु थःपिनि विषयगत अवधारणा अझं मबिउनिगुलिं खः। संविधान दयेकेगु एजेण्डा ज्वनाः चुनाव ल्वानाः त्याका वःगु पार्टीतय्सं हे थीथी विषयय् थःपिनि अवधारणा आः तक तयार याये मफयाच्वंगु कारणं संविधान च्वयेगु ज्या थथे लिज्यां वनाच्वंगु खः। संविधान च्वयेगु ज्याया लागिं राजनीतिक पार्टीत थःपिं हे जानाः कायम याःगु ई पुलेत आः ताःई म्वाःल। तर थज्याःगु सिसिककः अवस्थाय् थ्यनेधुंकाः नं संविधानसभा संविधानया मस्यौदा तयार यायेगु सिबें नं थःगु कार्यतालिकाय् लगातार संशोधन यायेत बाध्य जुयाच्वंगु दु। आः तक न्हय्क्वः संशोधन जुइधुंकल। यदि राजनीतिक पार्टीतय्गु पहः थथे हे जुयाच्वन धाःसा थुकी अझ मेगु निगू प्यंगू संशोधन जुइ मखु धकाः धायेफुगु अवस्था मदु। मात्र संविधान च्वयेगु छगू एजेण्डा ज्वनाः गठन जूगु संविधानसभा मेमेगु मुद्दां प्रभावित जुयाः निष्क्रिय जुयाच्वंगु धाथें नं दुर्भाग्यपूर्ण खः ।

More Stories Like this