अनुसन्धानयात हे शोंख दयेकाच्वंम्ह

नेपालभाषा, नेपाल संस्कृति व नेवाःतय् संस्कृति छु खः धइगु स्पष्ट मजुल धाःसा अध्ययन व अनुसन्धान यानाच्वंपिं मनूत सुरेशज्योतिया ग्वाहालि कायेत वइ। ख्वपया सुकुलध्वाखाय् थौं स्वयां पीनिदँ न्ह्यः २०२४ साल श्रावणं जन्म जूम्ह सुरेशज्योति शाक्य छम्ह अज्याःम्ह ब्यक्तित्व खः गुम्ह योग्य खयां नं प्रचारय् वये मयः। थीथी विषयय् अध्ययन अनुसन्धान यानाच्वंपिं देशी व विदेशी ब्यक्तित्वतय्त छम्ह ग्यसुलाःम्ह श्रोत ब्यक्ति कथं वय्कलं ज्या याना च्वनादीगु दु। शोंखं अध्ययनशील खःसां वय्कःया लजगाः धाःसा ज्यासः ज्या खः। अय्नं गनं ल्वहंपौ, सिजःपौ वा छुं अमूल्य व दुर्लभ ऐतिहासिक सामग्री लुल धाःसा उगु सामग्री गुलि पुलां व उकिया सांस्कृतिक महत्व गुलि दु धकाः सीके माल धाःसा वय्कःयात हे ब्वना यंकी। थुकी वय्कलं थम्हं सिउ कथं निःशुल्क सेवा बियादी ।

वय्कःया शुरुंनिसेंया रुची धाःसा पुलांगु मुद्राया संकलन खः। थ्व ज्या वय्कःया बाज्यांनिसें यानाच्वंगु जुयाच्वन। वय्कलं मुद्रा नापं पुलांपुलांगु ताडपत्र, थ्यासफू, बसजाः, हुलाक टिकट आदि नं मुंकातःगु दु। छुं पुलांगु बस्तु लुया वल धाःसा वय्कलं उकियात संग्रह यायेधुंकी। आः तक वय्कलं थःगु स्वअध्ययनं थ्व सम्बन्धी प्यंगू सफू नापं पिथनादीधुंकूगु दु।
बौद्ध धर्म दर्शनय् नं उलि हे रुची दुम्ह वय्कलं न्हापां 'लिच्छविकालीन नेपाली मुद्राहरूको लक्षण' नांगु सफू पिथनादीगु खः। वयां लिपा कुतः पिकाकया ग्वाहालिं 'ख्वप देय्या विहार बहीया जातः' नांगु अनुसन्धानात्मक सफू पिथनादिल। वयां लिपा 'ये धर्मा...... गाथाभिलेख संग्रह' पिकयादिलसा दकलय् लिपा 'जम्बूद्विपय् मुद्राया विकास क्रमय् लिच्छवि मुद्रा म्हसीका' नांगु अनुसन्धानात्मक सफू पिथनादिल ।

वय्कलं सन्ध्या टाइम्स, पसुका, थौंकन्हे, धर्मवाणी, भक्तपुर लय्पौ व थीथी विहारं पिथनीगु सफुली थःगु पिथनादीगु दु। बाज्या मानज्योति शाक्यं शुरु यानादीगु मुद्रा मुंकेगु ज्यायात वय्कलं निरन्तरता बियादीगु दु ।

अबु प्रेमज्योति शाक्य व ज्ञानलक्ष्मी बज्राचार्यया काय् सुरेशज्योतिं थःगु हे छेँय् मुनातःगु मुद्राया बारे जक अध्ययन यायेगु खःसा आपालं खँ लुया वइगु खनेदु। नेपाःया वर्तमान चन्द्र सूर्य अंकित राष्ट्रिय ध्वाँय् लिच्छविकालय् हे विकास जुइधुंकूगु दावी यानादीम्ह वय्कलं ख्वपया न्यातपौ देगः भूपतीन्द्र मल्लं दयेकूगु धकाः च्वयातःगु इतिहास नं मिले मजूगु खँ कनादी। वय्कःया कथं अन न्हापा हे न्यातपौ देगः दुगु खः, लिपा जुजु भूपतीन्द्र मल्लं स्वसःदँ न्ह्यः उकियात हे भब्य रुपं तःधं यानाः हानं दयेकूगु जक खः। उगु खँ जनकलाल बैद्यं पिथनातःगु छगू सफुली नं उल्लेख जुयाच्वंगु दु ।

म्हो उमेरय् हे नेपाःया इतिहास बारे थुगु ग्यसुग्यंगु अध्ययन यानादीम्ह वय्कः न्हूगु पुस्ताया लागिं छम्ह प्रेरणाया श्रोत जुइगु खँ विवाद मदु ।

More Stories Like this