आर्थिक संकट घोषणा याइगु ?

सभासद्तय्त स्वनिगः मत्वःतेत उजं

येँ (सन्ध्या टाइम्स)/देशय् जुइफुगु राजनीतिक दुर्घटनायात कयाः थीथी कथंया हल्ला जुयाच्वंगु इलय् लाक्क हे सत्तारुढ दलतय्सं देशय् आर्थिक संकटकाल घोषणा यायेगु विषययात कयाः नं सहलह ब्याकूगु खँ सीदुगु दु ।

एमाले व कांग्रेसया नेतातय् दथुइ म्हिगः प्रधानमन्त्री निवास बालुवाटारय् जूगु खँल्हाबल्हाय् थ्व विषययात कयाः नं सहलह जूगु खँ सम्बन्धित सूत्रं धाःगु दु ।

बजेट पारित यायेगु विषययात कयाः सरकार व माओवादी दथुइ जूगु तःगूमछि चरणय् च्वंगु बैठक नं असफल जुइवं आः थ्वपाखें मुक्त जुइत देशय् आर्थिक संकट घोषणा यायेगु खः लाकि धकाः नं चर्चा जूगु खँ एमालेया सचेतक भीम आचार्यं म्हिगः बीबीसी नेपाली सेवालिसे खँ ल्हायेगु झ्वलय् कनादीगु दु ।

वय्कलं धयादी, 'सेना, प्रहरी, जेलय् च्वंपिं कैदीतय्त जा नकेत, अस्पतालय् वासः बीत व भोकमरी जुयाच्वंगु थासय् नसाज्वलं थ्यंकेगु ज्याय् तकं आः आर्थिक संकट ब्वलनीगु सम्भावनायात ध्यानय् तयाः यदि माला वन धाःसा देशय् आर्थिक संकटकाल हे घोषणा याये फइगु संवैधानिक व्यवस्थाया बारे नं बैठकय् सहलह जूगु खः ।'

उखे नेपाली कांग्रेसया प्रमुख सचेतक लक्ष्मण घिमिरें नं निगू दलया बैठकय् जूगु थ्व सम्बन्धी चर्चाया पुष्टि यानादीगु दु। वय्कलं नं बीबीसी नेपाली सेवा लिसे खँ ल्हायेगु धयादिल, 'आर्थिक संकट हे ब्वलनीगु जुल धाःसा संकटकाल अथें हे वइगु जुल नि। अज्याःगु स्थिति मवयेकेगु लागिं हे माओवादीयात गम्भीरतापूर्वक थुइकेत इनाप यानागु दु।'
थ्वयां न्हापा कांग्रेस व एमाले दथुइ सदनय् होहल्लाया दथुइ जूसां नं बजेट पारित यायेगु धकाः सहमति जूगु खःसा माओवादीं थःपिंसं अथे यानाः तक नं बजेट पारित याके बी मखु धकाः ख्याच्वः बियातःगु दु। अथे खःसां थ्व स्थिति वयेफुगु खँयात ध्यानय् तयाः एमाले व कांग्रेसं थः सभासद्तय्त स्वनिगः त्वःताः पिहां मवनेत निर्देशन बियातःगु दु ।

कांग्रेस व एमाले दथुइ थज्याःगु सहलह जुयाच्वंगु खःसां सत्तारुढ दल व माओवादी दथुइ वार्ता जूगुलिं संकटकालया खँयात आःयात न्ह्यःने महःगु खँ धाःगु दु ।

यदि आर्थिक संकटकाल घोषणा जुल धाःसा उगु अवधिया दुने सरकारं देशय् न्ह्यागु कथंया आर्थिक गतिविधि याःसां छुट प्राप्त जुइ ।