बजेट पारित याकेत सहलह
न्ह्याथे यानाः नं बजेट हयेगु सरकारया कुतः
येँ (सन्ध्या टाइम्स)/राजनीतिक समस्या लिपा ज्यंकेगु कथं बजेट पारित याके बीत कांग्रेस व एमालें माओवादीयात इनाप यायेगु निर्णय याःगु दु ।
थौं सुथय् कांग्रेस व एमालेया दथुइ बालुवाटारय् च्वंगु बैठकं उगु इनाप यायेगु निर्णय याःगु खः। लिसें कांग्रेस व एमालें मेमेगु राजनीतिक मामिला व बजेट पारित यायेगु खँयात बिस्कं कथं स्वयेत नं इनाप याःगु दु ।
अथे हे थौंया बैठकय् माओवादीं सदन मचायेकल धाःसा होहल्लाया दथुं जूसा बहुमतं बजेट पारित यायेगु निर्णय नं याःगु दु। तर अथे याये स्वयां न्ह्यः फयांफछि सहमतिया हे लँपुइ वनेगु निर्णय नं याःगु दु ।
बैठक लिपा पत्रकारतलिसे खँ ल्हासें कांग्रेसया उपसभापति रामचन्द्र पौडेलं संसदीय प्रक्रियां हे बजेट पारित यायेगु खँ कनादिल ।
वय्कलं बजेट पारित यायेगु थीथी विकल्पयात कयाः सहलह जूगु जानकारी बिसें छन्हु निन्हुया दुने हे राजनीतिक सहमति कायम जुइगु विश्वास नं प्वंकादिल।
प्रधानमन्त्री माधव नेपालं थौं बजेट पारित यायेगु बारे सत्तारुढ दलया प्रमुख सचेतक व उपसचेतकत लिसे नं सहलह यानादीगु दु ।
उगु सहलहय् माओवादीं बियातःगु अल्टिमेटमया दुने हे समस्या ज्यंकेत सचेतकतय्सं सुझाव बिउगु खँ सीदुगु दु।
उकी माओवादीया माग संवोधन यायेगु निंतिं सरकारं क्यने फइगु लचकताया बारे नं सहलह जूगु खः ।
बजेट पारित याकेगु निंतिं प्रम नेपालं माओवादीया नेतात लिसे नं सहलह न्ह्याकूगु दु। प्रधानमन्त्री ज्याकू सिंहदरवारय् च्वनाच्वंगु उगु बैठकय् माओवादीया उपाध्यक्ष डा. बाबुराम भट्टराई, नारायणकाजी श्रेष्ठ व माओवादी संसदीय दलया प्रमुख सचेतक पोष्टबहादुर बोगटीं ब्वति कयाच्वंगु दुसा एमालेपाखें गृहमन्त्री भीम रावल दुथ्याः ।
प्रम नेपाल नापलाये न्ह्यः माओवादी नेता व गृहमन्त्री भीम रावल दथुइ नं गृह मन्त्रालयय् बिस्कं वार्ता जूगु खः। अनया वार्ता लिपा वय्कःपिं तप्यंक हे प्रम ज्याकुथी वंगु खः ।
प्रमं पुलांपिं अर्थमन्त्रीत लिसे नं सहलह यानादीगु दु। वर्तमान अर्थमन्त्रीं बजेट न्ह्याथे यानाः नं पारित यायेमाःगु कारण स्पष्ट यायेत थौं पत्रकार सम्मेलन सःताः नेपाःया धुकू खाली जुयाच्वंगु बारे जानकारी बीगु नं ज्याझ्वः दु ।
