सुनिश्चित ब्यवस्था वइगु गबलय् ?

कृष्ण प्रजापति

देशय् चुनावं वःगु दकलय् तःधंगु राजनीतिक पार्टीयात सत्तां पिहां वयेत बाध्य यासांनिसें शुरु जूगु नागरिक सर्वोच्चताया माग दुगु आन्दोलनया निगूगु चरण क्वचाःगु दु। आः स्वंगूगु चरणया आन्दोलन यायेगु निंतिं आन्दोलनरत एकीकृत माओवादीया अध्यक्ष प्रचण्डं थीथी राजनीति पार्टी व विशिष्ट ब्यक्तितय्त नापलायेगु ज्या तीब्र गतिं यानाच्वंगु दु। अन्तरिम संविधानय् सहमति व समझदारी जक उल्लेख जुयाच्वंगुलिं अले उकथंया व्यवस्था कथं समझदारी व सहमति कायम जुइ मफयाच्वंगुलिं राजनीतिक पार्टीत जक मखु नेपाली जनता हे निराश जुयाच्वंगु दु। थप उत्साह व जागरणया लागिं सतक आन्दोलन नापनापं थीथी विकल्प मालेगु ज्या नं जुयाच्वंगु दु। गब्लें सक्रिय राष्ट्रपतिया खँ वयाच्वंगु दुसा गब्लें संविधानसभा भंग यासें संवैधानिक आयोग नीस्वनाः संविधान तयार यायेमाःगु खँ न्ह्यःने वयाच्वंगु दु ।

थथे देशय् थीथी कथंया राजनीतिक अन्यौल जुयाच्वंगु इलय् ल्याय्म्ह शक्ति धाःसा थीथी देशय् थःगु श्रम मीत बाध्य जुयाच्वंगु दु। थःगु देशया भविश्य उत्साहजनक खने मदुगुलिं देय्या ल्याय्म्ह शक्ति विदेश पलायन जुइत बाध्य जूगु खः। कानून छगू कथं व ब्यवहार मेगु कथं जुयाच्वंगुलिं नं थौं देशय् विदेशीं धाः थे च्वनेगु वातावरण तयार जुजुं वनाच्वंगु खः। अथे जुयाः नं देशय् जिम्मेवार राजनीतिक पार्टीया नेतातय्सं दिल्लीयात मुस्मांतय् मक्का मदिना थें धकाः स्पष्ट रुपं अभिब्यक्ति बीगु तकया स्थिति वयाच्वंगु खः। शिक्षित जनसमुदाय अप्वयेकाः राजनीतिक अन्यौल समाप्त यायेगु नापं थीथी कथंया विकास निर्माणया ज्या यायेगु थेंज्याःगु राजनीतिक वातावरण तयार यायेगु खँय् गुगुं नं जिम्मेवार राजनीतिक पार्टीं ध्यान तये फयाच्वंगु मदु। खालि थःपिनि राजनीतिक भविश्य बांलाकेगु नामय् देशयात बर्‍हः तयेगु ज्या जक जुयाच्वंगु दु। गरीब जनता हे शिक्षित जुजुं वनाच्वंगु इलय् उमित उचित रोजगारी बी मफयेवं ल्याय्म्ह जनशक्तिं विदेश वनाः थःगु भविश्य माः वनीगु स्वाभाविक नं खः ।

राजनीतिक रुपं जनता शिक्षित जुइवं थःपिनि भविश्यया खैरियत मदु धकाः हे जिम्मेवार राजनीतिक पार्टीया नेतात स्वयमं प्रत्यक्ष परोक्ष रुपं सर्वसाधारणयात राजनीतिपाखें तापाकेत स्वयाच्वंगु दु। झीगु थेंज्याःगु कृषि प्रधान देशय् कृषि इन्जिनियरत उत्साहित मजुइगु व थनया बालीया उत्पादन म्हो जुइगु नं अथे जुयाः हे खइ। राजनीतिक रुपं न्ह्यःने लाःपिं मनूत हरेक लागाय् छाले ग्यनाः देशया नेतृत्व यायेत नं लिचिली मखु। देशय् फुक्कं मनूयात शिक्षित यायेगु ज्याय् न्ह्यचिलाच्वंपिं मनूतय्सं न्ह्याबलें सकारात्मक सोच तयाच्वनी। तर थौं राजनीति पार्टीतय्गु गतियात स्वयेगु खःसा आपालं मनूत शिक्षित जुइ वा भिनी धइगु ग्याना जूगु खनेदु। तःधंपिं व न्हापांनिसें राजनीतिक हैसियत दयेकाच्वंपिं मनूतय्सं थःपिनि भविश्य अन्यौलय् लाःवनी धइगु ग्याःचिकुं यानाः हे राजनीति याये मजिउ धयाच्वंगु खः। वास्तवय् राजनीति दकलय् यायेमाःगु विषय खः धइगु आः वयाः देशय् तःधंगु धाःगु राजनीतिक पार्टीतय्सं समस्याया निकास बांलाक तिफ्याये मफुगु कारणं हे सीकेफु। गरीब न्ह्यःने वःगु स्वये मफुपिंसं आः नं नेपाली जनतायात थीथी कथं राजनीतिं अलग्ग यायेगु षडयन्त्र यानाच्वंगु दु ।

थौं थीथी थासय् गांगामय् तकं चर्च, मस्जिद व थीथी कथंया न्हून्हूगु धार्मिक केन्द्रत स्थापना यानाः थीथी कथंया विद्वान वक्तात विदेशं हयाः प्रभावित यानाच्वंगु नं नेपाली जनतायात राजनीतिं अलग्ग यानाः थःपिं हे जक न्ह्याबलें राजनीतिक रुपं सर्वोच्च स्थानय् च्वनाच्वनेगु षडयन्त्र खः। वास्तवय् धर्मं मनूयात अफिमं कःम्ह थें एकोहोरो याइ। वयात जःखः स्वयेगु थःगु जीवन प्रति विश्लेषण यायेगु नापं थीथी कथं राजनीतिक रुपं सोच विकास यायेगु ज्यां न्ह्याबलेंया लागिं तापाक हे तइ। थौंकन्हय् देशय् फोहोर सफू पिकाइपिं व फिल्म दयेकीपिं प्रोत्साहित जुयाच्वंगु नं उकिं हे खइ। अले स्कुल कलेज न्ह्यःने हे अज्याःगु सामग्रीत मियातःसां सुनां छुं मयाःगु नं उकिं हे खइ। उलि जक मखु कि ल्याय्म्ह पुस्तायात अथे राजनीतिपाखें अलग्ग यायेगु हे षडयन्त्र स्वरुप सरकारी स्कुलय् कडा मयासे गजि त्वनेगु स्वतन्त्रता बिया तःगुया कारण नं थ्वहे खः। अथे नियन्त्रण यायेगु निंतिं स्कूल कलेज न्ह्यःने हे प्रहरी प्रशासन सक्रिय यायेमाःगु स्थिति वयाच्वंगु दु। गुलिं ल्याय्म्हतय्त बन्दूक ज्वंसा हे जक कम्यूनिष्ट जुइगु व बन्दूक मज्वन धाःसा कम्यूनिष्ट हे मखु धइगु गलत धारणा नं लानाच्वंगु दु ।

वास्तवय् मनू स्यायेवं व बन्दूक ज्वनेवं सुं कम्यूनिष्ट जुइगु मखु। कम्यूनिष्ट जुइत स्वार्थ व ब्यक्तिगत इच्छा त्याग याये फयेकेमाः। बन्दूक ज्वनेवं कम्युनिष्ट जुइगु खःसा निसःत्यादँ न्ह्यः हे गोर्खाया जुजु पृथ्वीनारायण शाहं २६ हजारया ल्याखय् बन्दूक ज्वंगु खः। उपिं कम्युनिष्ट मजू। २००७ सालं राणा विरुद्ध नेपाली कांग्रेसं नं बन्दूक ल्ह्वंगु खः। थथे राजनीतिक सुझबुझ हे मदयेक मनूतय्त भ्रम यायेगु जक ज्या यानाच्वंगुलिं नं कार्यकर्तात यक्व क्यनेफुगु पार्टीतय्सं नं थः कार्यकर्तातय्त उचित राजनीतिक दीक्षा बियातःगु मदु धइगु क्यं। देशय् नेपाली जनताया भविश्य सुनिश्चित जुइगु ब्यवस्था वयेकेत व फुकसियां नये त्वनेगु अधिकार चूलाकेत धाःसा कम्युनिष्ट ब्यवस्था हे मवयेकं मगाः। फुपिसं फुफुथें यानाः शासन याइगु व बल्लाःम्हेसिया न्याय जुइगु थ्व पुँजीवादी ब्यवस्थायात सदांया लागिं चीकेगु क्वातुगु पलाः ल्ह्वनेत नं इमान्दार कम्युनिष्ट पार्टीत न्ह्यःने मवसें मगाः। बन्दूकया भरय् क्रान्ति यायेगु मखुसें राजनीतिक व आर्थिक रुपं जनतायात सवल यायेत थनया तःतःधंगु कलकारखानात सामाजिकीकरण यायेमाः। जमीन जोते याःम्हेसिया जुइमाः। तर एमालें थजु वा माओवादीं थजु थःपिं सरकारय् वंगु इलय् नं थ्व छुं हे ज्या मयाः। नेपाली कांग्रेसं ला याइ हे मखु ।

धनीपिंत जक फाइदा यायेगु निंतिं सरकारय् वनेगु खःसा उगु पार्टी कम्यूनिष्ट पार्टी जुइ हे फइ मखु। सरकारय् वनाः नं जनताया सेवा यायेगु स्वयेमाःगु खः। तर थन पुँजीवादी सरकारय् वनाः नं कम्युनिष्ट जुयाच्वंपिं पार्टीत आपालं दु। थज्याःगु अन्यौलयात वाःचायेके मफुतले नेपाली जनतां वर्तमान राजनीतिक अन्यौलया निकास चूलाकेगु खँ अझ तापायेफु ।

More Stories Like this