प्लाष्टिकया म्हिचा मीम्ह प्रधानाध्यापक

कृष्ण

रामद्वारिका साखःयात ख्वपया छम्ह नमूना ब्यक्तित्व धाःसां जिउ। ख्वपया चांगुनारायण गाविसय् च्वंगु नाटेश्वरी प्राविइ झिंन्यादँ तक अध्यापन यानाः ब्रम्हायणी प्राविया स्थापना नापनापं सरकारी कोटाय् प्रधान अध्यापक जुयाः वसांनिसें वय्कलं ख्वपया बजारय् पसःपतिकं चाःहिलाः प्लाष्टिकया झोला मीगु ज्या नं शुरु यानादिल। थः विद्यार्थी, अभिभावक व सर्वसाधारणया न्ह्यःने हे वय्कः साइकलय् तयाः प्लाष्टिकया झोला मिमिउँ वयाच्वनी ।

झिंन्हय्दँ न्ह्यः प्रधान अध्यापक जुइवं वय्कलं थुगु ज्या नं शुरु यानादीगु खः ।

'शुरुइ ला भचा मछिंसे नं च्वंगु खः तर आः चाहिं समस्या मंत।' वय्कलं निर्धक्क जुयाः कनादिल। आः थ्वहे वय्कःया छगू थप विशेषता जुया बिउगु दु। थ्वहे ज्यां यानाः वय्कः विद्यार्थीतय् दथुइ 'झोलाचा सर' या नामं नं नांजाः। तर उगु उपाधियात वय्कलं थःगु मेहनतयात याःगु कदर कथं स्वीकार यानादी ।

झोला जक मिमिउँ वय्कलं २०५५ सालय् मोटरसाइकल छगः न्यानादिल। आः कमलविनायकय् थःगु हे छेँ छखा नं दनेधुंकल। सुथय् ७ निसें ९ बजे तक स्कूल वने मत्यःतले व बहनी ५ बजेनिसें ७ बजे तक न्हिं प्यघौ वय्कः प्लाष्टिकया झोला मीगु ज्याय् हे ब्यस्त जुयादी। शनिवाः व मेमेगु बिदाया न्हि नं वय्कलं थुकी हे उपयोग यानादी ।

छक्वः निक्वः वय्कःयात अभिभावक व हनेबहपिंसं प्रदुषण अप्वयेकीगु प्लाष्टिकया झोला छि थेंज्याःम्ह शिक्षित मनुखं मिया जुइगु मल्वः धकाः मधाःगु मखु। अय् जुयाः वय्कलं छक्वः प्लाष्टिक झोला दयेकीगु कारखाना हे बन्द याकेमाः, बरु थम्हं मेगु विकल्प मालाः ज्या याये धकाः ख्वप नगरपालिकाया तत्कालिन मेयर प्रेम सुवालयात सुझाव नं बियादीगु जुयाच्वन ।

रामद्वारिका साखं २०३६ साल मंसीर ७ गतेनिसें अस्थायी शिक्षक कथं अध्यापन शुरु यानादीगु खः। वय्कः साइकल गयाः हे पिख्यलय् च्वंगु नाटेश्वरी प्राविइ ब्वंकः झाइ। २०४९ साल तक अन ब्वंकेधुंकाः स्थायी शिक्षक कथं वय्कः सरकारी कोटाय् ख्वप १ वडाय् च्वंगु श्री ब्रम्हायणी प्राविइ प्रधानअध्यापक नियुक्त जुयादिल गुगु आः तकं जारी दनि। शुरुं प्रावि तृतीय श्रेणी कथं प्रधानाध्यापक जुयाः ब्रम्हायणी प्राविइ वःम्ह वय्कः आः आन्तरिक परीक्षाय् पास जुयाः प्रावि द्वितीय श्रेणीइ बढुवा जुयादिल। हाल वय्कः न्यागू तगिं तक दुगु ब्रम्हायणी प्राविया ८२ म्ह विद्यार्थीतय् हेडमास्टर जुया च्वनादीगु दु ।

उमेर न्यय्दँ पुलेधुंकूसां ख्वालं वय्कः स्वीन्यादँ तिनि दुम्ह ल्याय्म्ह थें खनेदु। ल्याय्म्हसू दनि। उलि हे मेहनती व लगनशील नं जुयादी। प्रधानाध्यापक जूगु सालय् हे वय्कः छेँय् बिस्कं च्वनेमाल। अले खर्च टरे यायेत झोला मीगु ज्याय् लगे जुयागु खँ वय्कलं कनादिल। स्कूलया न्हय्म्ह शिक्षकपिं मध्ये दकलय् अप्वः तलब नइम्ह थः खःसां थिकेगु बजाःभावं यानाः छेँ चले यायेत मगाः। उकिं झोला मियाः न्याद्वः खुद्वः थप आम्दानी यानाच्वनागु खँ वय्कलं कनादी।
सुथय् बहनी सुकलध्वाखा, भार्वाचो लागाय् साइकलय् प्लाष्टिकया म्हिचा तयाः मियाच्वनीम्ह वय्कःयात आः धाःसा उलि तलब मगाः मजू। २०४९ सालय् न्हापां ब्रम्हायणी प्राविया प्रधान अध्यापक जुयाः वःगु इलय् लय् ९०२/ तकां छेँ चले यायेमाः। अथे जुयाः वय्कः प्लाष्टिकया झोला मीगु ज्याय् लगे जुइमाःगु खः ।

मां रत्नमाया साखः व अबु सानुकाजी साखःया काय् कथं २०१६ साल असार १५ गते ख्वपया महालक्ष्मी त्वालय् बूम्ह वय्कलं प्लाष्टिकया झोला पर्यावरणया लागिं मनिं धकाः बांलाक हे सिउ। उकिं थ्व झोला बन्द यायेमाः धकाः छक्वः थ्व ज्या त्वःताः साइकलय् तयाः ककिचा, ताःफ्वः व उगुंथुगुं श्रृगारया ज्वलं मीगु ज्या नं शुरु यानादीगु खः ।

थगुने अबु मदुम्ह वय्कः थौंकन्हय् कलाः, म्ह्याय् निम्ह व काय छम्ह नापं शान्तिपूर्ण पारिवारिक जीवन हनाच्वंगु दु ।

More Stories Like this