अन्तिम इलय् वयाः तीव्र संवाद

बजेट पारित मयासें हे मगाःगु अन्तिम ई न्ह्यःने वयेवं राजनीतिक पार्टीतय् दथुइ संवादया गति तीव्र जूगु दु। याकनं समस्याया समाधान पिकायेमाः धकाः तःधंगु चीधंगु फुक्कं राजनीतिक पार्टीतय् दथुइ सहलह शुरु जूगु दुसा आन्दोलन यानाच्वंगु पार्टी माओवादीया अध्यक्ष प्रचण्ड ला म्हिगः सिंगापुर थ्यंक हे वनाः नेपाली कांग्रेसया सभापति गिरिजाप्रसाद कोइरालायात नापलानादीगु दु। नेपालय् दत्तले खास हे संवाद मजूसां अन्तिम इलय् थ्यंकाः सिंगापुर थ्यंक हे वनाः खँल्हाबल्हा याःवंगुलिं पार्टीतय् दथुया संवाद छुं निष्कर्षय् थ्यनेत्यंगु आभास बिउगु दु। यदि संवादं छुं निष्कर्ष पिकायेत्यंगु व उकिया कारणं हे थ्व वार्ता व लिमलाः फमलाः जुयाच्वंगु खःसा व बांलाःगु हे खँ जुल।
नेपाःया थौंया मू मुद्दा धइगु न्हू संविधान दयेकेगु व देय्यात संघीय व्यवस्थाय् यंकेगु खः। बाँकी खँ दथुइ वयाच्वंगु चिचीधंगु पंगः जक खःसा उकिं यानाः पिहां वःगु कचवं धइगु पार्टी व नेतातय् अहम् जक खः। थज्याःगु समस्या समाधान यायेगु खःसा थवंथवय् संवाद यानाः छुं भचा अहम् त्वःतेगु जक आवश्यकता दु। सत्तापक्ष व विपक्षीं थःपिनि अडानयात छुं भचा म्हो यात धाःसा थ्व समस्या अथें समाधान जुया वनी। उकुन्हु तक गुगुं हे पार्टी अज्याःगु अडान त्वःतेत तयार मदुगु खःसां आः अन्तिम इलय् वयाः उपिं थःपिनि अडानं छुं भचा कुहां वःगु संकेत नं वःगु दु। न्ह्यागु जूसां अन्तिम इलय् वयाः 'टाकटुक' समस्या समाधान याना वनेगु नेपाली राजनीतिक पार्टीतय्गु स्वभाव खः। थ्वहे स्वभाव कथं जक आःया समस्या ज्यना वंसां उकियात लसकुस यायेगु बाहेक मेगु विकल्प झीके मदु ।

More Stories Like this