जि ज्योतिष मखु, तर ... ...

नर्मदेश्वर प्रधान

जि ज्योतिष मखु। भविष्यवाणी यायेगु जिके क्षमता मदु। याःसां थासय् लाइ नं मखु। स्वयागुं भविष्यवाणी यायेगु दुस्साहस यायेगु जिं मयाना। ताक्सीं वैद्य जुइगु जिगु ज्या मखु ।

तर छगू खँय् धाःसा जिं भविष्यवाणी यानाबी। इलय्ब्यलय्। लिच्वः न्ह्याबलें थ्याक्क जुयाबी। धइगु मिले जुइ। भ्याःभति हे पाइ मखु। जि ज्योतिष खः धाये ला मखु धाये? भविष्यवाणी याये। सँ छपु नं पाइ मखु। गथे धाये अथे जुइ। गुलि मनूत जिल्ल जुइ। छं गय् सिल? न्ह्यसः थनी। छं धाःगु ला जुल। गुलि मनूत स्तब्ध जुइ। तर वहे छता खँय् जक जिं भविष्यवाणी यायेफु। मिले जुइ। मेमेगु खँय् मयाना। याये नं मसः। जिं सिउ यानाः मतलब नं दइ मखु। तर व खँय् ला जि थःत विशेषज्ञ हे तायेकेगु। 'का स्व, आ थथे जुइ' धाये। अथे हे जुया बी। न्यंपिं चकित। छ ला धात्थें अन्तरयामी खनी। गय् धाये फूगु। जिमि बारे नं भविष्यवाणी याना क्यँ रे। गुलिस्यां धाइ। जिं अस्वीकार याये। थःगु असमर्थता प्वंके। तर वयागु खँय् धाःसा जितः आत्मविश्वास दइ। 'का स्व व मफइन। वयात अस्पतालय् यंकी।' जिं जुइ निन्हु न्ह्यः हे धयाबी। धात्थें धया कुन्हु हे व मफइ। अस्पलताय् थ्यना च्वनी। छकः जक मखु। तक्वः हे वयागु बारे भविष्यवाणी याये धुन। सदां धयाथें जुइ। छुं हे उखेथुखे जुइ मखु। मेपिं अजूचाइ। गय् धाये फुगु छं धाइ। जितः थ्व भविष्यवाणी याये कथिन मजू। तसकं अःपुइ। छुं कुतः याना च्वनेम्वाः। गय् गय्। मनय् लुयाःवइ। 'का स्व। व ग्वारातुली नं। आः व थले जुइ।' मनय् लुइ। अले थ्व खँ। एक कान दुई कान मैदान याये। हल्ला जुइ। धात्थें व अस्वस्थ जुइ। विरामी जुइ। जिं सहज रुपय् यायेगु भविष्यवाणी पाइ मखु। गथे धया अथे हे जुया बी।
अस्वस्थ जुइ खँय् जक मखु। जिं वयागु ल्वय् छु? उकिया नं भविष्यवाणी याये। वयात स्वास प्रस्वासया समस्या जुइ। कठिनाइ वइ। अक्सिजनया कमि। डाक्टरं ला स्वास्थ्य परीक्षण याना धाइ। जि डाक्टर मखु। तर स्वास्थ्य परीक्षण मयाःसे हे धयाबी। का स्व। आः वयात। छन्हु निन्हुं हे सासः ल्हाये थाकुइ। अक्सिजन बी माली। न्हासय् अक्सिजनया पाइप तयेमाली। अस्पतालय् निन्हु प्यन्हु यंके माली। मेगु छुं जुइ मखु। लिभर, किड्नीया खँ वइ मखु। फुक्क ठीक। छुं स्यंगु मदु। ज्या बी। समस्या वहे स्वास प्रस्वासया। अक्सिजनया। छकलं अक्सिजनया कमी खने दइ। सासः ल्हाये थाकुइ। तुयूगु ख्वाः। वचुसे च्वनी। अक्सिजन बी। ख्वाः बुलुहुं यचुया वइ ।

उखुन्हु तिनि। जिं धयाच्वनागु। निन्हु प्यन्हु न्ह्यः। 'का स्व। व म्हं मफइन। वयात अस्पतालय् ब्वाकी।' जिं थ्व धयाबलय् तक नं व स्वस्थ तिनि। उसाँय् मदइगु लक्षण मदुनि। तर निन्हु लिपा। टिभीइ वइ। वयागु स्वास्थ्यय् समस्या खनेदत। अस्पतालय यंकल। अक्सिजन बिल। डाक्टरतय्सं वयात अस्पतालय तयेमाःगु सल्लाह बिल। जिं यानागु भविष्यवाणी न्यनाः गुलिसिनं न्यनी। आः व सी ला कि म्वाइ? जिं थ्व खँय् नं भविष्यवाणी याना बी। 'जरुर म्वाइ। थत्थें सीगु ला चान्स हे मदु।' छुं न्हिं लिपा व ठीक जुइ। स्वस्थ जुइ। न्हापा थें जुइ। वयागु ज्यानय् छुं खतरा मदु। जिं धाःथें वं स्वास्थ लाभ न्ह्याबलें याइ। गबलें भचा ई काइ। तर हानं न्हापा थें फुर्ति खनेदइ। तन्दुरुस्त जुइ। आः नं जिं भविष्यवाणी यानागु खः। ज्यानय् छुं जुइ मखु। लाइ। सकुसल छेँय् लिहां वनी। व ला अझं अस्पतालय् हे तिनि। डाक्टरतय्रं धयाच्वंगु दु। वयागु स्वास्थ्यय् क्रमिक सुधार जुयाः वयाच्वंगु दु। चिन्ताजनक स्थिति मदु। डाक्टरया खँ छखे तये। थ्व खँय् जिं बाजी तयेफु। वयात छुं जुइ मखु। व वनी मखुनि। लिहां हे वइ तिनि। डाक्टरतय्सं पितबीगु विज्ञप्तिं जिगु भविष्यवाणीयात पुष्टि यानाच्वनी।
गुलिसिनं न्यनी। छं गय् धाये फुगु थ्व? छं धाइबलय् हे व म्हंमफया च्वंगु दु। अस्पतालय् थ्यनाच्वंगु दु। अक्सिजन काये मालाच्वंगु दु। छंके ला दैवीशक्ति दु थें च्वं। भविष्यवाणी यायेगु। गुलिसिनं दः प्रशंसा याइ। तर जि फुरुङ्ग मजुया। जिं सिउ। जिके अज्याःगु दैवीशक्ति मदु। जिं भविष्वाणी यायेमफु। वहे छम्हेसिया बारे जक जिं भविष्यवाणी यायेगु खः। मिले नं यायेफु। थ्व खँय् धाःसा थःगु शक्तिइ विश्वास दु। व झंगः। गबलें मफइ जिं सिउ। जिके उकिया आभास निन्हु प्यन्हु न्ह्यः हे लुइ धुंकी। जिं मतिइ धाये। का आः थ्वयात सासः ल्हाये थाकुइ नं। आः थ्वं अक्सिजन म्हइन। धात्थें अथे हे जुइ। म्हय् हे मथीक छं गय् थथे धाये फुगु? गुलिसिनं न्यनी। जि शरीरया डाक्टर मखु। जिगु भविष्यवाणीया चिकित्साशास्त्र नापं स्वापू मदु। थ्व राजनैतिक मनोविज्ञानया विषय जुइ। व धुरन्धर राजनीतिज्ञ। राजनेता। छम्ह महत्वाकांक्षी। वया राजनैतिक मनोविज्ञानया खँ वइ थन। पिने थःम्हं धइथें राजनैतिक परिस्थिति जुइ मखु। वयागु अहंमय् आघात लाइ। वया मनोविज्ञानय् धू ब्वइ। कुँ जाइ। गुम्म गुम्म जुइ। वयात सासः ल्हाये थाकुइ। अक्सिजन माली। अस्पतालय् ब्वाके माली। थ्व हे क्रम। इलय् ब्यलय् न्ह्याइ। जिं सिउ। वया ल्वय् चिकित्साशास्त्रं लायेके फइ मखु। थ्व राजनैतिक मनोचिकित्साया विषय खः। हिप्नोटिज्म। अर्थात मनोचिकित्साया सम्मोहन विधि छ्यले दुसा वय्कःया ल्वय् बारे यथार्थ सीके फइ ।

narapradhan@yahoo.com

More Stories Like this