प्रचण्ड नं सिंगापुर ब्वल
वासः याकाच्वंम्ह कोइरालालिसे विशेष वार्ता
येँ (सन्ध्या टाइम्स)/ देशय् ब्वलनाच्वंगु राजनीतिक गतिरोधया निकास पिकायेत थीथी राजनीतिक दलतय् दथुइ तीव्र गतिं सहलह न्ह्यानाच्वंगु इलय् लाक्क माओवादी अध्यक्ष प्रचण्ड थौं सिंगापुरपाखे ब्वःगु दु ।
वय्कःया लिसें माओवादी विदेश विभाग प्रमुख कृष्णबहादुर महरा नं उखे झाःगु दु। वय्कःपिं थाई एअरया विमानपाखें ब्वःगु खः ।
उखे माओवादी प्रवक्ता दिनानाथ शर्मां धाःसा प्रचण्डया सिंगापुर भ्रमण निजी खः धयादीगु दु। अथे खःसां वय्कः उसाँय् मदयाः सिंगापुरय् वासः याकाच्वंम्ह नेकां सभापति गिरिजाप्रसाद कोइराला नापलायेत हे उखे झाःगु खँ सूत्रतय्सं धाःगु दु। वय्कःया थ्व भ्रमण स्वन्हु तक न्ह्याइगु खँ धाःगु दु। थ्व झ्वलय् वय्कलं अन वासः याकाच्वंम्ह कांग्रेस सभापति कोइरालालिसे गोप्य वार्ता यानादी ।
सूत्रया कथं प्रचण्डयात सिंगापुरय् हे नापलायेगु धकाः स्वयम् कोइरालां हे सःतादीगु खः। कोइराला येँय् दुबलय् खास खँ मजूसां आः निवाःया लागिं सिंगापुर वनाच्वंबलय् हे वार्ता यायेत्यंगुलिं वय्कःपिनि दथुइ गम्भीर कथंया हे सहलह जुइत्यंगु अनुमान नं थन यानाहःगु दु ।
वालुवाटारय् सुथंनिसें बैठक
राजनीतिक निकास मालेगु झ्वलय् थौं बालुवाटारय् सत्तारुढ स्वंगू दलया बैठक च्वंगु दु। बैठकं न्यान्हुया दुने बजेट पारित याकेगु बारे सहमति पिकाइगु खँ सीदुगु दु। न्यान्हुया दुने बजेट पारित याये मफइगु स्थितिइ उकिया विकल्प मालेगु बारे नं स्वंगू दल दथुइ सहमति जूगु दु ।
अथे हे बैठकय् राष्ट्रपतिया नां दुमथ्याकुसे मंकाः संकल्प प्रस्ताव तयार यायेगु, राष्ट्रपतिपाखें लिखित वक्तव्य बीकेगु वा राष्ट्रपति विरुद्ध महाभियोग दर्ता याकेत माओवादीयात सहमत याकेगु बारे नं सहलह जूगु खः ।
अथे हे थौं हे प्रम नेपाललिसे मधेशी जनअधिकार फोरम (लोकतान्त्रिक) या नेता व उपप्रधानमन्त्री विजयकुमार गच्छदारं नं सहलह यानादीगु दु। गच्छदार नापं एमालेया वरिष्ठ नेता केपी ओली नं थौं सुथय् प्रम निवास बालुवाटारय् थ्यंकः वंगु दु ।
लिसें कांग्रेसया कार्यवाहक सभापति सुशील कोइराला व उपसभापति रामचन्द्र पौडेलपिं नं थौं वालुवाटार वनाः प्रमयात नापलाःगु दु। वय्कःपिनि दथुइ नं निकास मालेगु बारे सहलह ब्याकूगु खः ।
