कोइरालाया स्वास्थ्य व देय्या राजनीति

वर्तमान नेपाली राजनीतिया शीर्ष पुरुष व नेपाली कांग्रेसया सभापति गिरिजाप्रसाद कोइराला उसाँय् मदयाः सिंगापुर वासः याकेत झाःगु दु। खतुं सिंगापुरय् नं वय्कलं डाक्टरतय्त 'जितः याकनं वासः याना बिउ, नेपाः वनाः समस्या ज्यंकः वने मानि' धयादिल धाःगु समाचार पिहां वःगु दु। ख ला वय्कःया स्वास्थ्य ठीक जुयाच्वंगु इलय् नं ग्वःगूमछि चरण वार्ता जुलं नं ज्यंके मफुगु थ्व समस्या वय्कः सिंगापुरं याकनं याकनं लिहां वयेवं तुं ज्यनी धइगु छुं ग्यारेन्टी दुगु ला मखु। अय्नं वय्कलं थज्याःगु अशक्त इलय् नं देशय् ब्वलनाच्वंगु राजनीतिक संकटयात कयाः गुगु चिउताः प्वंकादिल उकियात सराहना याये हे माः। न्ह्यागुसां देय्या वर्तमान संकटया इलय् कोइरालां वाउँगु मत मक्यंकं समाधान लुइगु सम्भावना अझ नं मदुनि। खास यानाः राष्ट्रपतिया पलाः संशोधन यायेगु व सरकारया नेतृत्व हिलेगु खँय् कोइरालाया सहमति हे मू खँ खः। उकिं वय्कः उसाँय् मदयाः थ्व सम्बन्धी एजेण्डाय् सहभागी जुइ मफुतले समस्या ल्यना हे च्वनीगु सम्भावना यक्व दु। थ्व अर्थय् देय्या राजनीति कोइरालाया स्वास्थ्य जःखः चाःहिलाच्वन धायेत शायद लिफः स्वयेमाःगु मदु। वय्कःया स्वास्थ्ययात हे ध्यानय् तयाः कांग्रेसया आन्तरिक राजनीतिक नं दथुइ गनं टक्क दिनाच्वंगु दु। वय्कःया स्वास्थ्यय् वइगु उतार चढावं कांग्रेसया आन्तरिक समीकरणय् नं थहां कुहां वयाच्वनीगु खँयात थन ल्वःमंके मजिउ। कांग्रेस अझ नं नेपाःया निर्णायक शक्ति जुयाच्वंगुलिं थ्वं छीगु छुं नं पलाखं देय्या राजनीतिक भविष्यय् लिच्वः लाकेफु। थ्व अवस्थाय् कोइरालाया स्वास्थ्यं सकसितं चिन्तित याना बीगु स्वाभाविक खः ।

More Stories Like this