चचा हुलाः न्हूदँ

नेपाल संवत् ११३० न्हूदँयात छगू फरक मोड बियाः हनेगु ताः तयाः थुगुसी बज्र कला कुञ्जपाखें शनिवाः येँया युनाइटेड वर्ल्ड सेन्टरया हलय् चचा प्याखं, जनजाति फेशन शो व नेवाः भ्वय्या छगू 'ककटेल ज्याझ्वः' यात ।

तुच्चां शुरु जुयाः भ्वजय् क्वचाःगु उगु ज्याझ्वःया दथुइ बज्र कला कुञ्जया संस्थापक नायः चन्द्रमान मुनिकार लगायत अनया मेपिं कलाकारतय्सं भैरव काली लगायत न्यागू चचा प्याखं न्ह्यब्वःगु खः ।

ज्याझ्वःया आरम्भ धाःसा शास्त्रीय सितारवादनं जूगु खः।
ज्याझ्वःया उलेज्या यासें मू पाहां संस्कृति मन्त्री डा. मिनेन्द्र रिजालं थःगु मौलिक कला ल्यंकेगु लागिं जुयाच्वंगु थज्याःगु ज्याझ्वःयात तिबः बीत थः सदां तत्पर दुगु बचं बियादिल।
वरिष्ठ संस्कृतिविद् सत्यमोहन जोशीं चचा धइगु छगू प्याखं जक मखु थ्व ला जीवन म्वायेगु छगू पद्धति खः धासें थुकिया ब्याख्या यानादिल ।

नेपाल संवत् ११३० न्हूदँ समारोह समितिया नायः व सभासद् तीर्थराम डंगोलं नेवाः संस्कृति हे नेपाःया म्हसीका खः धयादिल ।

चचा लिपा नेपाःया थीथी जनजातितय्सं पुनीगु वसःया फेशन शो जूगु खः। उकी थीथी जनजातितय्सं थःपिनि जातीय वसः पुनाः प्रदर्शन याःगु खः ।

ज्याझ्वःया अन्त्य् नेवाः भ्वय् जुल। करिब खुसःम्ह पाहां दुगु उगु भ्वजय् नेवाः भम्चिया वसः पुनातःपिं मिस्तय्सं मू सःगु अय्लाः लू वःगु खः ।

ज्याझ्वःया ग्वसाः खलः भाजु चन्द्रमान मुनिकारं न्हूदँया ज्याझ्वःयात छगू न्हूगु मोड बियाः न्ह्याकेगु ताः तयाः थुगु ज्याझ्वः यानागु खँ कनादिल ।

वय्कलं कनादी कथं थुगु ज्याझ्वःया फुक्क दृश्य नेपाल पर्यटन बोर्डया पहलय् खिचे यायेगु ज्या नं जूगु खः। लिपा उकियात हे डकुमेन्ट्री दयेकाः देश विदेशय् छ्वयेगु ग्वसाः दयेका तःगु दु। ज्याझ्वःयात सकसितं तसकं ययेकूगु खँ नं वय्कलं कनादिल ।

चचा प्याखंयात नेपाःया हे दकलय् पुलांगु व मौलिक प्याखंया रुपय् कायेगु याः। छगू इलय् गोप्य यानातःगु थ्व प्याखं थौंकन्हय् सार्वजनिक रुपं क्यनेगु व विदेशी पर्यटकतय्त नेपाःया मौलिक प्याखं धकाः न्ह्यःने तया बीगु छगू हे जक माध्यम जुयाच्वंगु दु ।

More Stories Like this