लोडशेडिङ थपे जुइन

थुगुसी न्हिं १२ घण्टा तक लोडशेडिङ जुइ

येँ (सन्ध्या टाइम्स)/चिकुला मौसम शुरु जुइवं विद्युत प्राधिकरणं लोडशेडिङया तयारी नं शुरु याःगु दु। प्राधिकरण सूत्रं बिउगु जानकारी कथं वइगु मंसिरंनिसें लागू जुइ कथं लोडशेडिङया न्हूगु तालिका पित बीत्यंगु खः ।

आः पिकायेत्यंगु न्हूगु तालिका कथं वालय् २० घण्टा तक लोडशेडिङ जुइ। थौंकन्हय् वालय् १२ घण्टा जुयाच्वंगु खः। लोडशेडिङया थ्व मात्रा चिकुला अप्वया वःलिसे ई नं अप्वया वनीगु खँ धाःगु दु ।

सूत्रया कथं थगुने थें थुगुसी धाःसा तसकं ग्यानापुगु लोडशेडिङ जुइ मखु। थगुने न्हिं १६ घण्टाया ल्याखं लोडशेडिङ जूगु खःसा थुगुसी न्हिं १२ घण्टा तक जक लोडशेडिङ जुइगु खँ नं धाःगु दु। थगुने खास यानाः कोशी खुसिबाः वयाः आपालं विद्युत पोल ग्वारा तूगुलिं भारतं वयेमाःगु मत समेत मवयाः देशय् गबलें मजूनि कथं मत स्यायेमाःगु अवस्था वःगु खः। तर थुगुसी धाःसा अज्याःगु अवस्था मवइगु खँ धाःगु दु ।

सूत्रया कथं थुगुसी भारतं नं मत वइगु जुयाच्वंगु दुसा उखे मध्य मर्स्याङ्दी नं पूरा क्षमताय् चले याये फइगु अवस्था दु। अथे हे कुलेखानीइ नं थुगुसी न्हापा स्वयां अप्वः लः मुंगु दु। थुपिं कारणं यानाः थुगुसी लोडशेडिङया ई थगुने स्वयां छुं भचा कम जुयाः उपभोक्तायात राहत जुइगु खँ धाःगु दु।
कोशी खुसिबाः वयाः ग्वारातूगु थां फुक्कं दयेकेगु ज्या क्वचायेधुंकूगु दुसा थुगुसीनिसें अनं पूरा मात्राय् मत दुहां वइगु जुयाच्वंगु दु। लिसें चिकुलाया लोडशेडिङ छुं भचा म्हो यायेगु लागिं भारतपाखें मेगु थप बिजुली न्यायेगु लागिं खँल्हाबल्हा जुयाच्वंगु खँ नं धाःगु दु ।

थौंकन्हय् नेपालय् कुल ७५० मेगावाट विजुलीया माग दुसा सरकारं जेनतेन यानाः ६०० मेगावाट मत आपूर्ति यानाच्वंगु दु। मगाःगु मतया लागिं लोडशेडिङ याये मालाच्वंगु खः।
नेपालय् न्हूगु विद्युत परियोजनात आः तक छुं हे शुरु मजूनिगु कारणं मेगु च्यादँ झिदँ तक थज्याःगु लोडशेडिङ जारी हे जुयाच्वनीगु खँ नं प्राधिकरण सूत्रं धाःगु दु ।