नेवाःतय् भूमिइ अस्पतालया मिखा

राजधानी दुने थीथी पार्टीया आड कयाः चायेकातःगु खास यानाः निगू अस्पतालं स्वनिगः दुने लानाच्वंगु सार्वजनिक जग्गात हड्पे यायेगु लागिं न्ह्याकाच्वंगु कुतलं थनया नेवाःतय्त थारान्हुइका बिउगु दु। थःपिं सरकारय् दुगु मौका लाकाः खास यानाः एमालें थःपिंसं हे चायेकातःगु मनमोहन अस्पतालयात व माओवादीं जनमैत्री अस्पतालयात स्वनिगःया सलंसः रोपनी जग्गा 'दान' बीगु प्रपंच न्ह्याकूगु दु गुकियात सकस्यां विरोध याये हे माः। नेवाः प्रदेश दुने च्वंपिं नेवाःतय्सं ला उकियात पनेगु हे पलाः छीमाः ।

अस्पताल निर्माण स्वयम् छगू समाजसेवाया ज्या खः। उकिया पलिस्थायात सुनां नं विरोध यायेमाःगु आवश्यकता मदु। तर अज्याःगु अस्पतालयात तःधं यायेगु नामय् गुगुं नं थाय्या अर्बौं तका तूगु सलंसः रोपनी जग्गा हड्पे यायेगु ज्या धाःसा पाय्छि मखु। स्वनिगः धइगु थनया आदिवासी नेवाःतय्गु लागा खः। अले थनया भूमि धइगु उमिगु हे सम्पत्ति खः। स्वनिगःया आदिवासी नेवाःतय्गु भूमि इतिहासया थीथी कालखण्डय् थीथी कथं राज्यसत्तां हड्पे यानाः थौं थनया नेवाःतय्त भूमिहिन अवस्थाय् लाका बीधुंकूगु दु। उकिं आः सुनां नं थनया भूमिइ छुं नं त्वहःचिनाः हस्तक्षेप यात धाःसा उकियात थनया आदिवासी नेवाःतय्सं पने हे माः। थ्व उमिगु अधिकार खः। उकिसनं थौंकन्हय् राज्य पुनर्संरचना यानाः आदिवासीया ल्हातय् राज्यया अधिकार लित बीगु अभियान न्ह्यानाच्वंगु इलय् नेवाःतय् स्वीकृति बिनाः सुनां नं थनया भूमिइ थी तकं दइ मखु। थ्व खँयात राज्यं वाःचायेकाः पलाः छीमाःगु ला द हे दु, मछिउसा नेवाःत सचेत जुयाः पलाः छीमाःगु दु ।

More Stories Like this