विष्णु सक्वया 'लय'या न्हापांगु शो

उसाँय् मदयाच्वंम्ह कलाकार, संगीतकार व गायक विष्णु सक्वं दयेकादीगु नेपालभाषाया संकिपा 'लय' म्हिगः छगू ज्याझ्वःया दथुइ येँया राष्ट्रिय नाचघरय् प्रदर्शन जुल। स्वयम् कलाकार विष्णु सक्वया हे भिं उसाँय्या कामना यासें उगु संकिपाया च्यारिटी शो जूगु खः ।

नेपाल सांस्कृतिक संघ येँ जिल्लाया ग्वसालय् जूगु उगु ज्याझ्वलय् कलाकार एवं संकिपा निर्माता विष्णु सक्वयात नं दोसल्लां न्ययेकाः हनेगु ज्या जूगु खः। संघया नकिं मय्जु सविता महर्जनं वय्कःयात हनापौ देछानादीगु खः। उगु हे ज्याझ्वलय् वय्कःयात टिकट मियाः वःगु ध्यबा कथं ५०,००० तका दां नं लःल्हाःगु खः। फिल्म क्यनेगु ज्याया लागिं गठित पुचःया संयोजक सुरेन्द्र तुलाधरं वय्कःयात दोसल्लां न्ययेकादीगु खः ।

ताः ई निसें दिनाच्वंगु उगु फिल्मयात आः पूवंकाः प्रदर्शन याःगु खः। वज्रयोगिनी फिल्मस् प्रा.लि.या थ्व फिल्म करिब डेढ घण्टा ताःहाकः। थ्व खास यानाः संगीत ख्यलय् स्थापित जुइत संघर्ष यानाच्वंम्ह छम्ह संगीतकारया बाखं खः। गुकियात कवि राजभाई जकःमिं च्वयादीगु खःसा निर्देशन आर्यम नकःमिं यानादीगु खः। थुकिया निर्माता विष्णु सक्व व बोधिसत्व शाक्य खःसा उकी संगीत तयेगु ज्या विष्णु सक्वं हे यानादीगु खः ।

फिल्म स्वयेत नेपालभाषा फिल्म व संगीत ख्यःया आपालं हस्तीपिनि उपस्थिति दुगु खः। कलाकार सक्वं सकसितं न्हिलाः न्हिलाः अभिवादन यानादिल ।

सः बांलाक थहां मवःम्ह भाजु सक्वया थौंकन्हय् छेँय् हे उपचार जुयाच्वंगु दु। भाजु सक्वं नेपालभाषाय् आपालं हिट म्येँ, संगीत व म्युजिक भिडियो बियादीगु दुसा थ्व वय्कःया निगूगु फिल्म खः ।

More Stories Like this