सुथय् हे मन्त्री सिंहदरवारय्

थौं नं माओवादीपाखें सिंहदरवार घेराउ

येँ (सन्ध्या टाइम्स)/म्हिगःनिसें शुरु जूगु माओवादीया सिंहदरवार घेराउ ज्याझ्वः थौं नं जारी दु। थौं नं सुथय् ८ बजेनिसें हे माओवादी शीर्ष नेतातय् नेतृत्वय् अन धर्ना न्ह्यानाच्वंगु दु ।

माओवादी नेता कार्यकर्तातय्सं सिंहदरवार दुहां वनेगु च्यागुलिं नाकाय् धर्ना बियाच्वंगुलिं अन कर्मचारी दुहां वने फयाच्वंगु मदु। अथे खःसां गृहमन्त्री भीम रावल व प्रहरी महानिरीक्षक रमेश चन्द ठकुरी धाःसा सुथय् ६ बजे न्ह्यः हे सिंहदरवार दुहां वंगु दु ।

अथे हे उपप्रधानमन्त्री विजय गच्छदार व शान्ति मन्त्री रकम चेम्जोङ्ग लगायत छुं मन्त्रीत नं सिंहदरवारय् दुहां वनेधुंकूगु दुसा छुं सचिव व उपसचिवत नं दुने थ्यनेधुंकूगु खँ सीदुगु दु ।

तर क्वय्या तहयापिं कर्मचारीत धाःसा दुने वनेमखंगुलिं सिंहदरवार लागा सुनसान जुयाच्वंगु दु ।

म्हिगःया धर्नाया झ्वलय् छथाय् प्रहरी व माओवादी दथुइ झडप जूगुलिं थौं माओवादीं धर्नायात शान्तिपूर्ण यायेत वाइसीएलयात थःगु युनिफर्म सहित धर्ना क्षेत्रय् परिचालन याःगु दु। प्रत्येक नाकाय् स्वसःम्हया ल्याखय् वाइसीएल परिचालन यानातःगु दु ।

आः वाइसीएलयात दकलय् न्ह्यःने तयाः धर्ना ज्याझ्वःयात संयमतापूर्वक न्ह्याकाच्वंगु दु। लिसें थौं नं अन थीथी नाकाय् सांस्कृतिक ज्याझ्वः नं जुयाच्वंगु दु ।

म्हिगः ५ बजे तक घेरे याःगु खःसा थौं २ बजे तक जक घेराउ याइगु खँ धाःगु दु ।

२ बजे लिपा छगू र्‍याली पिकयाः देय् चाःहिलेगु व भृकुटीमण्डपय् सभा यायेगु ज्याझ्वः दयेका तःगु दु ।

फुक्कं नाका चायेकेफु : गृहमन्त्री

येँ (सन्ध्या टाइम्स)/थम्हं चाहे जूसा माओवादीं घेरे यानातःगु सिंहदरवारया फुक्कं नाका चायेकेफुगु खँ गृहमन्त्री भीम रावलं धयादीगु दु। थौं सुथय् सिंहदरवारय् पत्रकारतलिसे खँ ल्हासें वय्कलं थ्व खँ धयादीगु खः। वय्कलं प्रहरी रक्षात्मक अवस्थाय् च्वनाच्वंगु दु धासें माओवादीं आम हडताल घोषणा यात धाःसा थःपिंसं नं वहे कथं सुरक्षा रणनीति दयेकेगु खँ नं वय्कलं धयादिल ।

वय्कलं आन्दोलन शान्तिपूर्ण जुइमा धकाः हे थःपिंसं हस्तक्षेप मयानागु खँ नं वय्कलं कनादिल। गृहमन्त्री रावलं सिंहदरवार दुनें प्यंगुलिं ध्वाखाय् वयाः निरीक्षण नं यानादीगु खः ।