सेनाय् जुइ मफयाच्वंगु छगू बढुवा

सेनाया उपरथी तोरणजंग बहादुर सिंहयात रथी पदय् बढुवा यायेगु खँयात कयाः प्रधानमन्त्री व रक्षा मन्त्री दथुइ हे विवाद शुरु जूगु दु। देशय् राजनीतिक हिउपाः वयेधुंकाः सेनायात लोकतान्त्रीकरण याना यंकेगु एजेण्डायात पार्टीतय्सं स्वीकार याःगु खःसां तोरणजंग बहादुर सिंहयात बढुवा यायेमाः धकाः पार्टीतय् दुनें हे बिचाःपिहां वयाच्वंगु धाथें नं दुर्भाग्यपूर्ण खँ खः ।

आः विवादय् वयाच्वंम्ह उपरथी सिंह जुजुया शासनकालय् भैरवनाथ गणय् च्वनाः माओवादीया आपालं कार्यकर्तायात स्यायेगु व बेपत्ता यायेगु ज्याय् ल्हाः दुम्ह धकाः द्वपं लानाच्वंम्ह खः। वयात रथी पदय् बढुवा यायेसातकि कन्हय् प्रधानसेनापति जुइगु पाः वयागु हे जुइ। थौं विश्वन्यंकं हे मानव अधिकारया खं विशेष थाय् कयाच्वंगु इलय् नेपालय् मानव अधिकारया हनन् याःम्ह धकाः विश्वं म्हसिउम्ह मनूयात प्रधानसेनापति दयेकेबलय् कन्हय् थःत मानव अधिकारवादी धकाः दावी याइपिं अमेरिका, युरोप थेंज्याःगु देय्यात वयालिसे व्यवहार यायेत थाकुइफु। उकिं नं उमिसं थ्व खँयात विशेष महत्व बियाः ल्ह्वनाच्वंगु खः ।

नेपाःया सेना आः शाही कालया सेना मखयेधुंकल। उकिं थुकिया छबी व चरित्र निगुलिं हिलेमाःगु आवश्यकता दु। थौंया ईयात ल्वःगु विगत व स्वभाव मदुम्ह सुं हे मनूयात जिम्मेवार थासय् तयाः ज्या याकेगु कदापी पाय्छि जुइ मखु। स्वय्म सेनां हे थज्याःगु दावी मयानाच्वंगु इलय् आन्दोलनया हे पृष्ठभूमिं सत्ताय् वःपिं नेतातय्सं वयागु पक्षय् बिचाः तया जुइगु स्वयम् लोकतन्त्रया नं अपमान खः। विदेशी दवावया कारणं जक मखु स्वयम् नेपाःया निंतिं नं थ्व बांलाःगु ज्या मखु ।

More Stories Like this