ताम्सालिङ स्वायत्त राज्यया सीमानकंन प्रति देय् दबूया आपत्ति

नेवाःतय् राष्ट्रिय संगठन नेवाः देय् दबूं ताम्सालिङ स्वायत्त राज्य घोषणा याःगु ईलय् नेवाः स्वायत्त राज्यया नं सीमांकन यायेत स्वःगु धासें उकी आपत्ति प्वंकूगु दु ।

देय् दबूया नायः नरेश ताम्राकारं बुधवाः छगू विज्ञप्ति ‍पिथनादिसें ताम्सालिङ संयुक्त संघर्ष समितिं वंगु कार्तिक २१ गते ताम्सालिङ स्वायत्त राज्यया घोषणा याःगु ईलय् न्ह्यथंना तःगु बुंदा १३य् नेवाः स्वायत्त राज्यया सीमाकंन यायेत नं स्वःगु धासें आपत्ति प्वंकूगु दु । उगु ज्या पाखें नेवाः राज्यया सीमाना गैर नेवाः समुदाय पाखें लाडे यायेगु कथं जूगुलिं थ्व प्रचलित राजनैतिक अभ्यास व अन्तराष्ट्रिय मान्यता विपरित जूगुलिं उगु घोषणा भिंकेत नेवाः देय् दबूं सम्वन्धित पक्षयात इनाप याःगु दु ।

अथेहे देय् दबूं एकल जातिं मेगू जातिया अस्मिताय् आघात लाइ कथं गणराज्यया घोषणा याइवलय् आपसी जातिय सद्भावय् खलल लायेफइगु धासें थंज्याःगु ज्यां संघीयता व जातीय राज्यया विरोधीतय्त अप्रत्यक्ष फाइदा जुइगु पाखे ध्यान बीत इनाप याःगु दु ।

विज्ञप्तिइ राज्य पुनःसंरचनाया आधार ऐतिहासिक, जनसंख्याया वाहुल्यता व निरन्तरताया आधार व अन्तरिम संविधानया व्यवस्था कथं जुइमाःगु खँय् बः ब्यूसें प्रादेशिक सीमा वा मेगू छुं विषयया विवादयात आपसी संवादया माध्यमं समस्या समाधान यायेमाःगु खँ न्ह्यथंनातःगु दु ।

More Stories Like this