सेना समायोजनय् सहमति

समितिइ कांग्रेस नं च्वं वइगु जुल

सेना समायोजन सम्बन्धी समिति गठनय् वयाच्वंगु समस्या आःयात समाधान जूगु दु । उगु समितिइ प्रमुख पार्टीपाखें निम्ह-निम्ह प्रतिनिधियात दुजःया रुपय् तयेगु खँय् थौं सहमति जुइवं समिति गठनय् वयाच्वंगु समस्या समाधान जूगु खः ।

थ्व बारे सहलह यायेत थौं स्वंगू प्रमुख पार्टीत माओवादी， एमाले व कांग्रेस दथुइ वालुवाटारय् बैठक जूगु खः । उगु बैठकय् सत्तारुढ पार्टी माओवादीं समितिइ फुक्कं प्रमुख पार्टीया निम्ह निम्ह प्रतिनिधि तयेगु खँय् सहमति प्रकटयायेवं समस्या ज्यंगु खः । कांग्रेसं यदि समितिइ थःगु पार्टीया निम्ह प्रतिनिधि तयेगु खःसा जक थःपिं उकी च्वं वये फइ धकाः अडान कयाच्वंगु कारणं समितियात थुकथं न्हूगु रुप बीमाःगु खः । माओवादीं धाःसा समितिइ सकस्यां छम्ह छम्ह जक दुजः तयेगु खँ धयाच्वंगु खः । थ्व सहमति लिपा समितिइ कांग्रेस नं च्वं वइगु जूगु दु ।

थौंया बैठकय् ब्वति कयाः पिहां वःम्ह कांग्रेस नेता डा. रामशरण महतं वालुवाटारय् पत्रकारतलिसे खँ ल्हासें समितिइ निम्ह निम्ह प्रतिनिधि तयेगु खँय् सहमति जूगु दु । आः समितिंपूर्णता काइ धकाः विश्वास प्वंकादिल । एमालेया वार्ताकार भीम रावलं नं सहमति कायम जूगुलिं आः समितिं याकनं ज्या याये फइगु खँ कनादिल ।

माओवादी सूत्रं धाःसा आः सेना समायोजन समितिइ फुक्क पार्टीया निम्ह निम्ह दुजः तयेबलय् सेना समायोजनया प्रक्रिया अझ जटिल जूवनीगु बिचाः प्वंकूगु दु । कांग्रेसं अझ नं माओवादी सेनायात नेपाली सेनाय् ल्वाकछ्याये मजिउ धकाः हे अडान कयाच्वंगु दनि ।

उखे सेना समायोजन सम्बन्धी समितिइ च्वनेगु खँय् सहमति कायम जूसां कांग्रेसं थौंकन्हय् संसद बहिष्कारयानाच्वंगु ज्याझ्वः धाःसा बन्द मजुइगु खँ धाःगु दु । कांग्रेसं न्ह्यब्वःगु ९ बुँदे मागय् प्रधानमन्त्री प्रचण्ड थम्हं हे स्पष्टीकरण बिउ मवःतले संसद बहिष्कार यानाच्वनेगु घोषणा यानातःगु खः । सेना समायोजन समितिया समस्या समाधान जूसां कांग्रेसं न्ह्यब्वयातःगु ९ बुँदे मागया खँ समाधान मजूनिगु कारणं संसद बहिष्कार जारी हे जुइगु खँ धाःगु दु । थौं वालुवाटारय् च्वंगु बैठकय् नं सेना समायोजन समिति बाहेक थ्व समस्या बारे छुं नं खँ मजूगु जानकारी वार्ताकारतय्सं बिउगु दु ।