कर्मचारीयात मन्त्रीपाखें आक्रमण

कृषि राज्यमन्त्री करिमा बेगमं थःगु हे गृह जिल्ला पर्साया सीडीओयात ल्हाः वाःगु घटनायात कयाः कर्मचारीत आन्दोलित जूगु दु। एअरपोर्टय् थःत कायेगु लागिं भ्वाथःगु गाडी छ्वया हल धकाः मन्त्री बेगमं सीडीओयात अथे ल्हाः वाःगु जुयाच्वन। सीडीओ थेंज्याःम्ह मनूयात छम्ह मन्त्रीया पदय् च्वनाच्वंम्ह जनप्रतिनिधिं ल्हाः वायेगु ज्या धाथें नं घृणा याये बहः जू ।

राज्यमन्त्रीपाखें जूगु थ्व हातपातया घटनां नेपाःया जनप्रतिनिधि धाःपिं मनूत संसद व सरकारय् छाय् वनीगु जुयाच्वन धइगु खँ नं उला बिउगु दु। थुपिं देश व जनताया सेवा यायेगु सिबें नं ध्वाँय् दुगु गाडी गयाः मोज मज्जा यायेगु लागिं जक सदन व सत्ताय् वनीगु जुयाच्वन धइगु खँ थ्व थुकिं प्रस्ट याना बिउगु दु। थःत कायेगु लागिं वःगु गाडी पुलां जुल धकाः सीडीओयात हातपात यायेगु ज्याया लिउने जनतायात लबः दइगु छुं नं खँ मदु। यदि जनताया निंतिं मयासें मगाःगु छुं ज्या सीडीओं मयाःगु व उकिया हे कारणं मन्त्रीं ल्हाः वाःगु खःसां नं थुकियात छगू हद तक मनासिब धाये फइगु खः। छुं ई न्ह्यः वन मन्त्री जुयाच्वंम्ह मातृका यादवं नं तस्करतय्त साथ बियाच्वन धइगु खँयात कयाः एलडीओयात चःबिइ कुनेगु ज्या याःगु खः। तर आः राज्यमन्त्री बेगमं याःगु ज्याया लिउने अज्याःगु छुं नं सन्दर्भ मदु। थ्व नितान्त व्यक्तिगत खँलिसे स्वाःगु घटना खः। यदि सरकारी निकाययाके दुगु गाडी पुलां खःसा, माःगु साधन मदुगु खःसा व कर्मचारीया दोष मखु स्वयम् सरकारया दोष खः। थौंकन्हय् सरकारया समीकरण मिले यायेगु बाहेक थज्याःगु खँय् ध्यान बीगु फुर्सद मदु। मय्जु बेगमं थ्व घटनाया लागिं जनतायाके क्षमा फ्वने हे माः ।

More Stories Like this