सिंहदरवार ठप्प
माओवादीया शीर्ष नेतात नं धर्नाय् च्वं वल
येँ (सन्ध्या टाइम्स)/एनेकपा (माओवादीं) थःगु पूर्व निर्धारित आन्दोलन कथं थौं सिंहदरवार दुहां वनेगु फुक्क लँपु ठप्प याना बिउगु दु। माओवादी अध्यक्ष प्रचण्ड नापं उपाध्यक्ष मोहन वैद्य व महासचिव रामबहादुर थापा (बादल) लगायतया नेतात थःपिं हे थ्व धर्नाय् सहभागी जुयाच्वंगु दु।
अथे हे संयुक्त जनआन्दोलन संयोजक समितिया अध्यक्ष डा. बाबुराम भट्टराई, पोष्टबहादुर बोगटी व झक्कु सुवेदीपिंसं माइतीघर मण्डलाय् धर्ना बियाच्वंगु दुसा अमिक शेरचन, पम्फा भुसाल, वर्षमान पुनपिंसं बबरमहल लागाय् धर्ना बियाच्वंगु दु ।
पद्मोदय माविइ उपाध्यक्ष नारायणकाजी श्रेष्ठ (प्रकाश) या नेतृत्वय् धर्ना बियाच्वंगु दुसा अनामनगरय् कृष्णबहादुर महरा, लिलामणि पोखरेलया नेतृत्वय् धर्ना जुयाच्वंगु दु।
माओवादीं सिंहदरवार दुहां वनेगु च्यागुलिं नाकाय् सुथय् ८ बजेनिसें धर्ना शुरु याःगु खः। धर्नाया कारण सिंहदरवारय् कर्मचारीत दुहां वने फयाच्वंगु मदु। छुं सचिवत सुथय् धर्ना न्ह्यः हे सिंहदरवारय् दुहां वंगु खःसां कर्मचारीत मथ्यंगुलिं ज्या धाःसा जुयाच्वंगु मदु ।
न्हिथं भिडभाड जुइगु सिंहदरवार दुनेया लागा थौं सुनसान जुयाच्वंगु द। सिंहदरवार दुने दुहां वंपिं सचिवत दुने बैठक च्वनाच्वंगु धाःसां नं खास बैठक धाःसा मजूगु खँ धाःगु दु। माओवादीं थौं न्यागू लाख कार्यकर्ता हयाः सिंहदरवार घेरे यायेगु ज्याझ्वः तयातःगु खः ।
माओवादीया धर्ना न्हिनय् तक शान्तिपूर्ण रुपं न्ह्यानाच्वंगु दुसा धर्नाय् च्वनाच्वंपिं कार्यकर्तातय्सं नाराबाजी लिसें म्येँ हालाः प्याखं ल्हुयाच्वंगु दु ।
सरकारं आन्दोलनयात ध्यानय् तयाः सिंहदरवार जःखः द्वलंद्वः जनपथ व सशस्त्र प्रहरी परिचालन याःगु दु।
अमिक शेरचनया ल्हाः त्वःधुल
येँ (सन्ध्या टाइम्स)/धर्नाया झ्वलय् प्रहरी व माओवादी कार्यकर्ता दथुइ तनाव नं ब्वलंगु दु। माइतीघर मण्डला व बबरमहलय् घेराउ बियाच्वंपिं माओवादी कार्यकर्तात निषेधित क्षेत्र उल्लंघन यानाः न्ह्याः वनेत स्वयेवं तनाव जूगु खःसा नेतातय् निर्देशन लिपा कार्यकर्तात लिहां वंगु खः।
उखे न्हिनय्पाखे दक्षिण ध्वाखाय् प्रहरीं लाठीचार्ज याःगु दु। उकी लानाः जनआन्दोलन राष्ट्रिय संयोजन समितिया उपाध्यक्ष अमिक शेरचनया ल्हाः त्वःतूगु दु। अन निगू पक्ष दथुइ अप्पां कयेकाः ल्वापु जूगु दुसा प्रहरीं टियरग्याँस नं प्रहार याःगु दु ।
