माओवादी खनाः भारत ग्याःनि

छवाःया भ्रमण लिपा झलनाथ थौं लिहां वल

येँ (सन्ध्या टाइम्स)/भारतं नेपालय् माओवादी हावी जूगु संविधान स्वये चाहे मजूगु खँ एमालेया अध्यक्ष झलनाथ खनालं धयादीगु दु ।

छवाः ताःहाकःगु भारत भ्रमणय् झायाच्वनादीम्ह अध्यक्ष खनालं थौं नेपाः लिहां वयेगु झ्वलय् त्रिभुवन अन्तर्राष्ट्रिय विमानस्थलय् पत्रकारतलिसे खँ ल्हासें उगु खँ धयादीगु खः।
वय्कलं भारतं छगू दलया वश्वर्च मखुसें सहमतिया आधारय् संविधान दयेकेत नं सुझाव बिउगु जानकारी बियादिल।
वय्कलं धयादिल, 'भारतं माओवादी हावी जूगु संविधान स्वये चाहे मजू। सहमतिया आधारय् फुक्कं दलयात मान्य जुइगु संविधान वयेमाः धइगु भारतया चाहना दु ।'

थःगु भारत भ्रमण सफल जूगु दावी यासें वय्कलं नेपाःया शान्ति, संविधान निर्माण प्रक्रियाय् भारतया उच्च सद्भाव दुगुलिं थःगु भ्रमण उपलब्धीमुलक जूगु खँ कनादिल।
भारतं नेपाःमि जनताया फैसलाय् समर्थन यायेगु बचं बिउगु खँ कनादिसें अध्यक्ष खनालं नेपाःया आन्तरिक समस्या ज्यंकेत विदेश वनेगु प्रचलन दुसां नं नेपाःया राजनीतिक दलत मिले जुइमाः धइगु चाहना भारतया दुगु खँ नं कनादिल।
भारतीय अधिकारीतय्सं नेपाःया भूमि छ्यलाः भारतीय सुरक्षाय् खतरा जुइ फइगु जिज्ञासा तःगु व थम्हं जःलाखःला देय्या विरुद्ध नेपाःया भूमि छ्यले मबीगु सरकारी धापू न्ह्यब्वयागु खँ वय्कलं कनादिल ।

भारतीय नेतातय्सं नेपाःया संविधान दयेकेगु, शान्ति प्रक्रिया, शान्ति सुरक्षा, राजनीतिक दलतय् दथुइ समझदारी लगायतया विषयय् जिज्ञासा तःगु खँ नं वय्कलं कनादिल ।

पत्रकारतलिसे खँ ल्हायेगु झ्वलय् अध्यक्ष खनालं राष्ट्रिय सहमतिया निंतिं फुक्क दलत छप्पँ जुइमाःगु खँय् बः बियादिसें माओवादीयात आन्दोलन त्वःताः वार्ता व सहमतिइ वयेत नं इनाप यानादिल ।

'अनमिनपाखें हस्तक्षेप जूगु मदु'

अध्यक्ष झलनाथ खनालं नेपाःया मामिलाय् अनमिनपाखें हस्तक्षेप जुल धाये मछिंगु बिचाः नं प्वंकादीगु दु। नेपालय् राष्ट्रिय सरकार दयेकेमाः धकाः दकलय् न्हापां एमालें धाःगु खः धासें यदि थ्व बिचारय् देशी विदेशी पासापिंसं समर्थन यात धाःसा उकियात हस्तक्षेप मखु स्वागत हे यायेमाः धकाः नं वय्कलं धयादिल ।