भारतय् झलनाथ खनालया अपमान

सत्तारुढ एमालेया अध्यक्ष झलनाथ खनाल वंगु छवाः न्ह्यः भारत भ्रमणय् झाःगु खः। उगु इलय् वय्कलं भारतया थीथी राजनीतिक पार्टीया नेताया लिसें भारतीय सत्तारुढ दलया अध्यक्ष व प्रधानमन्त्री मनमोहन सिंहयात नं नापलायेगु कुतः यानादीगु खः। अले वय्कःया थ्व कुतः असफल जुइगु अवस्थाय् थ्यंगु खः। तर भ्रमणया अन्तिम इलय् वयाः भारतीय राजदूत थःहे भारत वनाः भारतीय प्रमयात नापलायेगु व्यवस्था यायेमाःगु अवस्था वल ।

अध्यक्ष खनालया भ्रमणया झ्वलय् भारतीय सत्तारुढ पार्टीं याःगु थज्याःगु व्यवहारं छु खँयात संकेत यानाच्वंगु दु धइगु न्ह्यसः थौं ब्वलनाच्वंगु दु ।

अध्यक्ष खनाल नेपाःया राजनीतिक पार्टीया नेता जक मखु वय्कः सत्तारुढ राजनीतिक पार्टीया अध्यक्ष नं खः। तर भारतीय सत्तारुढ दलं वय्कःयात उलि महत्व मबिउगु धइगु नेपाःया नेतातय् हैसियतय् तकं न्ह्यसः थना बिउगु दु।
खतुं लिपांगु इलय् वयाः जूसां भारतीय राजदूतया कुतलं भारतीय प्रमयात नापलाये फत। तर सत्तारुढ गठबन्धनया अध्यक्ष सोनिया गान्धीं धाःसा नापलायेगु छुं हे संकेत मबिउ ।

थःगु हे सरकारया ब्वनाय् थःगु देय्या भ्रमणय् वःम्ह जःलाखःला देय्या सत्तारुढ दलया नेतायात नाप मलायेगु धइगु छगू कथं अपमान यायेगु हे खः। पदीय हैसियतं स्वयेगु खःसा सोनिया गान्धी व झलनाथ खनालया हैसियत छगू हे खः। अले थ्व पदीय हैसियतया कारणं भारतं थुकथं अपमान याये मजिउगु खः। तर नेपाःया नेतातय्के दुगु भारतपरस्त चिन्तनया कारणं हे भारतं नेपाःया नेतातय्त थथे अपमान याःगु खः धायेछिं ।

More Stories Like this