न्हूदँया लसताय् संगीत नाइट
नेपाल संवत् ११३० न्हूदँया लसताय् नेवाः जागरण मञ्चया भातृ संगठन नेवाः जागरण संकिपा मञ्चया ग्वसालय् नेवाः संगीत नाइट वंगु शनिवाः येँया क्षेत्रपाटी पार्टी प्यालेसय् अतिकं न्ह्यइपुक सम्पन जुल ।
ज्याझ्वलय् सभासद् एवं न्हूदँ समारोह समिति-११३० या नायः तीर्थराम डंगोल, नेपालभाषा मंकाः खलःया महासचिव नरेशवीर शाक्य, नेवाः जागरण मञ्चया संयोजक सुजीव बज्राचार्यं संगीत नाइटय् सहभागी जूपिं ल्याय्म्हतय्त संवोधन यानादीगु खः ।
उगु ज्याझ्वलय् नांजाःम्ह कलाकार व ख्यालि जुजु मदनकृष्ण श्रेष्ठं नं म्येँ हालाः मनोरंजन बियादीगु खः। करिब खुसःम्ह मनूतय् सहभागिता दुगु उगु संगीत नाइटय् नांजाःपिं गायकत भीम तुलाधर, विकास श्रेष्ठ, विजयमानसिंह तुलाधर, रिता महर्जन, माणिक शाही, गोविन्द ह्यूमत, मारुनी भण्डारी, ऐश्वर्य स्थापित, सानुबाबु महर्जन, पवनराज बज्राचार्य, लसता जोशी, हरिशरण साय्मि लगायत नेपालभाषाया कलाकारतय्सं थःथःपिनि म्येँ प्रस्तुत यानादीगु खः ।
ज्याझ्वलय् कलाकार मदनकृष्ण श्रेष्ठं पार्टी प्यालेसया प्रोप्राइटर दिनेश श्रेष्ठ, दीपक डंगोल व पंकज श्रेष्ठयात नेवाः जागरण मञ्चप्रति थौं तक याना वःगु ग्वाहालिया कदर यासें सम्मान याःगु खः। ज्याझ्वलय् नेपालभाषाया आपालं हनेबहःपिं मनूतय् नं उपस्थिति दुगु खः ।
More Stories Like this
जातीय संघीयताया खँय् नेमकिपा प्राडो, पाजेरो ब्वाकेगु ख्यः मखु राष्ट्रपति प्रणाली बारे विवाद नेवाःतय्त जागृत याइगु 'नेपाःमिया नुगः सः' खँ स्वनिगःया
