नेवाः स्वायत्त गणराज्य घोषणा याइगु
नेवाःतय् मंकाः ध्वाँय् न्हापांगु खुसी झण्डोत्तोलन याइगु
थीथी दलया नेवाः संगठन व नेवाः आन्दोलनकारी पुचःत जानाः नीस्वंगु नेवाः स्वायत्त राज्य मंकाः संघर्ष समितिं थ्वहे वइगु पोहेलाथ्व नवमि (पुस ११ गते) कुन्हु नेवाः स्वयात्त गणराज्यया घोषणा याइगु जूगु दु ।
थीथी थासय् जातिय गणराज्य घोषणा यायेगु ज्या जुयाच्वंगु ईलय् नेवाःतय् बाहुल्य दुगु थासय् नं जाती स्वायत्त गणराज्य कथं नेवाः स्वायत्त गणराज्य 'नेपालमण्डल' घोषणा यायेत्यंगु खः ।
पूर्व घोषित आन्दोलनया ज्याझ्वः कथं एनेकपा (माओवादी) स्वयात्त गणराज्य घोषणा यायेगु ज्याझ्वः लितकासां माओवादीया हे जातीय कवःतय्सं थाय् थासय् जातीय गणराज्य घोषणा यानाच्वंगु ईलय् नेवाःतय् बाहुल्य दुगु थासय् धाःसा नेवाःतय् मंकाः संघर्ष समितिं नेवाः गणराज्यया घोषणा यायेगु ज्याझ्वः क्वछीउगु खः ।
घोषणा यायेगु न्हि कुन्हु नेवाः स्वायत्त गणराज्यया राजधानी येँया दशरथ रंगशालाय् छगू तःजिगू ज्याझ्वः यानाः थ्व घोषणा जुइत्यंगु खँ ग्वसाः खलकं धाःगु दु । उगु न्हि कुन्हु बसन्पुलि छगू विशाल र्याली पिथनाः देय् चा:हीला दशरथ रंगशालाय् थ्यंकाः घोषणा याइगु ज्याझ्वः दु । थुगु न्हियात नेवाः गणराज्य पलिस्था जूगु न्हि जुइगुलिं उत्सवया कथं न्यायेकीगु खँ नं ग्वसाः खलकं धाःगु दु ।
वहे ज्याझ्वःलय् नेवाःतय् मंकाः ध्वाँय्यात अन हे सार्वजनीक यानाः ब्वयेकीगु व न्हापांगु खुसी झण्डोत्तोलन याइगु ग्वसाः दु ।
लूमंकेबहजू, नेवाः स्वायत्त राज्य मंकाः संघर्ष समितिइ माओवादी, एमाले, कांग्रेसया नेवाः संगठनत नापं नेवाः देय् गू नेपाल मण्डल, नेवाः जागरण मञ्च लगायत संस्थात दुजः कथं दु ।
More Stories Like this
मेरिल्याण्डय् लाखय् व पुलुकिसिलिसे हन येँयाः स्यस्यः समाजं सत्यमोहन जोशीयात हन मूलयात ग्वाहालि लःल्हात मेहेन्दी च्वयेगु कासा जुइगु मचातयत मां भाय् स्यनेगु संस्था नीस्वन
