नेपाःया मक्का व राष्ट्र संघया हस्तक्षेप

नेपाःया राजनीतिइ भारतया हस्तक्षेप व प्रभाव आः चर्चा याना च्वनेमाःगु विषय मखये धुंकल। नेपाःया फुक्क हे पार्टीया नेतात नेपाली राजनीति बारे छुं निर्णय याये माल कि दकलय् न्हापां न्हूदिल्ली छक्वः निं वना वइ। तर आः नकतिनि भारत भ्रमण यानाः लिहां वःम्ह संविधानसभाया छगू महत्वपूर्ण पार्टी मधेशी जनअधिकार फोरमया अध्यक्ष उपेन्द्र यादवं अझ छपलाः न्ह्यःने वनाः भारत धइगु ला नेपाली राजनीतिया मक्का मदिना हे खः धकाः घोषणा याना बिउगु दु। भारतयात नेपाली राजनीतिया मक्का घोषणा यानाः वय्कलं थः जक मखु नेपाःया सम्पूर्ण राजनीतिक पार्टीतय्गु आगं नं उला बिउगु दु। वय्कलं धाःगु थ्व धापूयात गुगुं हे पार्टीया सुं नं नेता मखु धायेगु आँट याःगु मदुनि। सुनां थ्वयात मखु धायेगु धृष्टता याइ, वं उगु 'मक्का'य् हज याः वने खनी मखु। उपेन्द्र यादवया थ्व धापू नेपाली राजनीतिइ भारतीय हस्तक्षेपया नांगां किपा खः ।

तर अजूचायापुगु खँ, भारतीय छत्रछायाय् थुभनं लाचार जुइमाःगु नेपाली राजनीतिया गोटीतय्सं निर्माण यानातःगु वर्तमान सरकारं संयुक्त राष्ट्र संघं नेपाःया आन्तरिक मामिलाय् हस्तक्षेप यात धकाः चिल्लाय्दनाः तसकं हास्यास्पद अवस्था सिर्जना यानाच्वंगु दु। नेपालय् राष्ट्रिय सहमतिया सरकार दयेकेमाः धकाः राष्ट्र संघं बिउगु सुझावयात नेपाःया आन्तरिक मामिलाय् याःगु हस्तक्षेप धकाः सरकारं याःगु थ्व टिप्पणी वास्तवय् नेपालं प्रस्तुत याःगु छगू अन्तर्राष्ट्रिय जोक सिबाय् मेगु छुं मखु। थ्व इलय् ति नेपाली राष्ट्रियताया बिजोग इतिहासय् शायद हे जक गबलें जूगु दयेमाः ।

More Stories Like this