नेवाः स्वायत्त गणराज्य नेवाःतय्सं हे घोषणा याइगु
रंगशालाय् भव्य ज्याझ्वः
येँ (सन्ध्या टाइम्स)/जातीय स्वायत्त गणतन्त्र घोषणाया ज्याझ्वः माओवादीं स्थगित याःसां नेवाःत थःपिं हे जानाः नेवाः स्वायत्त गणराज्य घोषणा याइगु जूगु दु। थ्वहे वइगु पोहेलाथ्व नवमि (पुस ११ गते) कुन्हु नेवाः स्वायत्त गणराज्यया राजधानी येँय् छगू विशाल र्याली प्रदर्शन यासें थ्व घोषणा यायेत्यंगु दु ।
थीथी नेवाः आन्दोलनकारी पुचःत जानाः नीस्वंगु नेवाः स्वायत्त राज्य मंकाः संघर्ष समितिया ग्वसालय् थ्व घोषणा जुइत्यंगु खः।
ज्याझ्वः कथं वकुन्हु येँया बसन्तपुलिं छगू तःधंगु र्याली पिकयाः देय् चाःहीकेगु व वयां लिपा दशरथ रंगशालाय् वनाः छगू सभा यासें नेवाः स्वायत्त गणराज्य घोषणा याइ। स्वायत्त गणराज्य पलिस्था जूगु उद्घोषया रुपय् नेवाः मंकाः ध्वाँय् नं अन हे ब्वयेकीगु ज्याझ्वः जुइ। मंकाः ध्वाँय् तयार जुइधुंकूगु दुसा उकियात अन हे न्हापांखुसी झण्डोत्तोलन याइगु ग्वसाः दु ।
उगु नेवाः ध्वाँय् नेवाः स्वायत्त राज्यया फुक्क सिमानाय् यंकाः ब्वयेकुसें नेवाः राज्यया सीमा नं दावी याइगु ज्याझ्वः दु ।
माओवादीपाखें थःपिनि आन्दोलनया झ्वलय् थीथी जातीय स्वायत्त गणराज्य घोषणा यायेगु धकाः क्वःछिनातःगु ज्याझ्वः स्थगित याःसां थीथी जातीय पुचःतय्सं थःथःपिं हे जानाः स्वायत्त गणराज्य घोषणया ज्या यानाच्वंगु दु। थ्व झ्वलय् वंगु कार्तिक २१ गते ताम्सालिङ स्वायत्त गणराज्य घोषणा जूगु खःसा म्हिगः किरात स्वायत्त गणराज्य घोषणा जूगु खः। थ्वहे झ्वलय् नेवाःतय्सं नं आः थःपिं हे जानाः नेवाः स्वायत्त गणराज्य घोषणा यायेगु निर्णय याःगु खः ।
उगु ज्याझ्वःयात जिक्व भव्य यायेगु लागिं अर्थ, सञ्चार, स्वयम् सेवक व जातीय खलः पुचः परिचालन धकाः प्यंगू उपसमितित नं गठन जूगु दु ।
ताम्सालिङ सीमाय् नेवाःया विरोध
वंगु कार्तिक २१ गते ताम्सालिङ संयुक्त संघर्ष समितिपाखें याःगु ताम्सालिङ घोषणाया छुं बुँदायात नेवाः स्वायत्त राज्य मंकाः संघर्ष समितिं आपत्ति प्वंकूगु दु।
ताम्सालिङपाखें थःगु राज्य घोषणा यायेगु झ्वलय् नेवाः राज्य धकाः स्वनिगःया शहरी लागा जक त्वःताः फुक्क लागाय् दावी याःगुलिं थ्व विरोध याःगु खः। थज्याःगु विवादास्पद खँय् याकःचां दावी यायेगु पलेसा सहलह व संवाद यानाः न्ह्याः वनेत तयार दुगु खँ नं नेवाः संघर्ष समितिं धाःगु दु ।
