दः कंगु

नर्मदेश्वर प्रधान

बाबाजी। म्हासुगु गेरु वसः पुनातःम्ह। दारी ताःहाकः। कपाः छगलं श्रीखण्डया सिन्हः। हिन्दी भासं खँ ल्हाइ। थज्याःपिं बाबाजीत लँय् खनाच्वनी। गबलें छेँय् चुकय् दुहां वइ। सम्वाद त्वःती। जितः थज्याःपिं बाबाजीतय् विश्वास मदु। उमित खनी। गबलें खं छू मयाना। उमिसं धयाच्वंगु खँ ताःछु मयाना। 'बेटा'। छ अथे जुइ। थथे जुइ। 'बेटा' गुलिसित उमित भविष्यवाणी याना बी। गबलें छ मनू पवित्र। स्वच्छ। तर। छन्त महीपिं। स्यंकीपिं दइ। ख्याच्वः बी। ध्यबाया आशा याइ। बाबाजी धयापिं फुक्कं ठग खः। जिं बिचाः याये। थज्याःपिंत पत्याः याये मजिउ। मन स्यंका बीयः थज्याःपिंसं। जिगु मान्यता जुइ ।

छाय् थें। तर उखुन्हु जिगु बिचाः पाना बी। मसिउ। छम्ह बाबाजी जिगु छेँ न्ह्यःने दं वइ। जिं वयात छुं मधया। वं धाइ। 'बेटा'। जिं छता धाये। न्यँ।' बिचाः याये। छकः स्वये। वं छु धाइ थें। थज्याःपिंत जि विश्वास ला मदु। अय्नं मतिइ लुइ। विश्वास मदयेवं वयागु खँ हे मन्यनेमाःगु मदु। उत्सुक जुइ। स्वये। वं छु धाइ। थौं छकः न्यने। 'बेटा छर्का दां बिउ रे दः।' बाबाजीं धाइ। ध्यबा फ्वनी। तर व ठग थें ताइ मखु दः। अप्वः फ्वंगु मखु। जाबा छर्का दां। थ्वयात गय् ठग धायेगु?। छर्का जक फ्वनीम्ह। थ्व लोभीम्ह बाबाजी मखु। छर्का धइगु छु? गन ला गन जुइ? तर्क याये। आपाः फ्वंसा धकाः खुँ धाये, ठग धाये। छर्का धाःम्ह मनू। सन्तोषी हे जुइमाः थ्व। जोगी, बाबाजी प्रति दुगु जिगु नकारात्मक दृष्टि हुइ। जितः मनय् छर्का दां बीमास्ते वइ। बी। मनय् तःधंगु सन्तोष जुइ। बाबाजी लय्ताइ। छर्कायात बाबाजीं लाख तायेकी। सुवाः बी। जि उलि अन्धविश्वासी ला मखु। अय्नं व बाबाजी लय्ताःगु खनी। वं सुवाः न्यने। मनोवैज्ञानिक प्रभाव लाइ ।

बाबाजी वनी मखु। बाबाजीं हानं धाइ। 'बेटा। जिं छता धाये। छं बी फइ ला?' मतिइ धुक्क जुइ। थ्व बाबाजी लोभी खनेमदु। महत्वाकांक्षी मजू। थ्वं ततःधंगु फ्वनी मखु। साधारण जक फ्वनी। फुसा बी। मफुसा मफु धाये। विश्वास/ अन्धविश्वासया खँ मखु। चीचा धंगु। फुसा बीका। जितः छाय् थें उखुन्हु नुगः भ्याः हे झ्यातु मजू। बाबाजी लिसे न्ह्याइपुके धइगु मतिइ लुइ।
'जितः लः छकः त्वंकी रे।' बाबाजीं लः फ्वनी। लः धयागु ला छु खः। छेँय् दइगु। न्ह्याम्हेसिनं धाःसां बीमाः। लः त्वंकेगु उपकार नं धाइ। बाबाजीया माग प्रति दः श्रद्धा वनी। गिलासय लः हयाबी। बाबाजीं लुधंक लः त्वनी। 'बेटा। आशिर्वाद छन्त।' सुवाः बी। जिगु मनय् स्वां ह्वइ। आशिर्वाद बर्से जुयाच्वनी बाबाजी पाखें। जि नं छु। छुं अप्वः बीमाःगु मखु। छर्का, छगिलास लः। छुं तःधंगु वस्तु मखु। थथे हल्काफुल्का ग्वाहालि यायेमाःसा थाकु चायेमाःगु नं मखु ।

बाबाजी लः त्वने धुंकाः नं मवं। मतिइ लुइ। थ्वं हानं छु धाइ। तर जि मग्याः। चिन्ता मदु दः। थ्वं ततःधंगु छुं धाइ मखु। चिचीधंगु न्ह्यःने दुगु बी। छाय् धन्दा काये। 'बेटा। फलफूल दइला?' केरा न्याना हयागु लुमन। निपु केरा बी का छु। बिचराया नये पित्यात जुइ। निपु केरा धइगु उलि थिकेगु नं मखु। नकाबी का केरा। जिं मय्जुयात सःता। केरा निपु हिं धया। बाबाजीयात बिया। बाबाजीं केरा लय्तायाः नल। प्वाः फुदंथें तायेकी। 'जय जुइमा बेटा।' हानं सुवाः बी। तसकं किफायतम्ह जोगी खनी। गुलि जोगीतय्सं गुलिसित ठगे याःगु खँ न्यने। जोगीत बाबाया भेष कया वइ। अनेक खँ ल्हाइ। मनूतय्त ध्वं लाइ। थज्याःगु घटना यक्व न्यने नं। तर थ्व जोगी ला। अज्याःम्ह खनेमदु। साधारण। स्वरे। छर्का दां। छगू गिलास लः। केरा निपु। छुं मखु थ्व। मामुली। थ्वयात फ्वगिंम्ह जोगी धाये मजिउ। निपु केरा नयाः प्वाः फुदंम्ह। अलौकिक शक्ति दुम्ह धायेल्वः। मनय् अनेक खँ लुइ।
'बेटा। छंगु ल्हाः छकः स्वये।' जोगीं ल्हाः स्वयेगु बिचाः प्वंकी। ल्हाः स्वइम्ह नं जुयाच्वन का थ्व बाबाजी। जितः थज्याःगु खँय् भ्याः हे भति विश्वास मदु। थौंतक जिं गबलें सुयातं नं ल्हाः मक्यना। थ्व फुक्क फय्गं खः। ल्हाः स्वया भविष्यवाणी याइपिंत धाये। जिगु मान्यता आः नं वहे तिनि। ल्हाः क्यनेगु खँय् आस्था मदु। थुमिसं मन जक स्यंकाः बीयः। खःगु मखुगु खँ धाइ। वाहियात। तर थौं जिगु बिचाः भचा हिली। विश्वास अविश्वासय छाय् खँ ल्हाना च्वनेगु। छकः क्यनाः स्वयेका। वं धायेवं विश्वास यायेमाःगु छाय्? बाबाजीया खँ छकः न्यनेगु उत्सुक जुइ। न्ह्याइपुके मास्ते वइ। बाबाजीयात जिं ल्हाः बी। बाबाजी खुब न्हिली। दंग जुया धाइ। 'छं न्हूगु छेँ दनी तिनि। मोटर न्याइ तिनि बेटा।' बाबाजीं जिगु उज्ज्वल भविष्य उलाबी। विश्वास ला दुगु मखु। अय्नं वयागु भविष्यवाणी न्यने। न्ह्याइपुसे च्वनी। म्हंगसय् मखनागु खँ धयाच्वंथें ताइ। 'बेटा। जिते रहो।' बाबाजीं लिसा लिसा कया धयाच्वनी ।

'बेटा आः जि वने।' बाबाजीं धाइ। न्ह्याइपुया च्वंगु। बाबाजी भचा च्वंसा जिउथें ताइ। 'बेटा।' बाबाजीं वनेत्ययेका सःती। विदा कायेत्यंगु जुइमाः। मतिइ लुइ। 'बेटा। जिं छगू धाये। अन्तिम। बी ला?'। 'जिउ' जिं धया। मतिइ तये। थ्व बाबा लोभी मजू। छु हे धाइ वं। बाबां धाइ। 'जाकि फछि व न्यासः दां बिउ बेटा। जि मुक्तिनाथय् वने त्यना। छन्त पुण्यलाइ बेटा।' खँ न्यने। सिमां कुतुं वंथें जुइ। सकलम्ह जोगी। बाबाजी न्ह्यःने दं वइ। म्हुतुं च्वाक्क धाये वइ। 'जिके मदु। बी फइ मखु।' 'अय्सा लिपा वये।' वं धाइ। 'जिं वादा याये फइ मखु। बाबाजी, जि ज्या दु। थनं पिहां हुँ ।'

थ्व पासा पञ्चजुया अनुभव खः। दः कंगु।

narapradhan@yahoo.com

More Stories Like this