माओवादी लचकतायात थुइकेमाः

ताः ईनिसें न्ह्यानाच्वंगु राजनीतिक गतिरोधया कारणं बजेट तकं पेश याये मफयाः समस्या जुयाच्वंगु इलय् माओवादीया अध्यष पुष्पकमल दाहाल 'प्रचण्डं' बजेट पारित याकेत छन्हुया निंतिं जक जूसां सदन चले याके बीगु खँ धयादीगु दु ।

निश्चय नं प्रचण्डया थ्व खँ सकारात्मक जक मखु लसकुस यायेबहःजू। थौं सरकारं बजेट पारित याये मफयाः विकास निर्माणय् जक मखु कर्मचारीतय्त तलब तकं नकेत थाकुयाच्वंगु इलय् वःगु थज्याःगु खँयात सरकार लगायत सरकारय् दुथ्याःगु राजनीतिक पार्टीतय्सं लसकुस यायेमाः ।

खतुं सामान्य खँ नं राजनीतिक परिदृश्यय् लाकीगु प्रभाव तसकं दूरगामी व फलदायी जुइफु। अले थज्याःगु खँयात राजनीतिक पार्टीतय्सं थुइकेमाः। नकतिनि माओवादीं याःगु थ्व निर्णय नं नेपाःया वर्तमान गतिरोधयात चीकेगु छगू बांलाःगु लँपु जुइगु विश्वास आम जनतां यानाच्वंगु दु ।

तर माओवादीं बजेट पारित याकेत क्यंगु लचकतायात वयागु कमजोरी कथं थुइकेगु भूल धाःसा राजनीतिक पार्टीतय्सं याये मजिउ। छाय्धाःसां थौंया विषम राजनीतिक परिस्थितियात थुइकाः हे माओवादीं थ्व निर्णय याःगु खः धइगु खँय् शंका मदु।
अथे जुयाः आः माओवादीं क्यंगु थ्व लचकतायात थुइकाः सरकारय् संलग्न दलतय्सं नं माओवादीलिसे वहे कथंया व्यवहार यायेफत धाःसा निश्चित दु न्ह्यानाच्वंगु राजनीतिक गतिरोधं याकनं दिपाः काइ। तर थुकियात मखु कथं थुइकेत स्वत धाःसा थुकिं आःयात बजेट पारित जूसां भविष्यय् गतिरोध अझ तच्वया वनी ।

More Stories Like this