दिल्लीं वयेवं हिउपाः संकेत
खनालयात भारतीय प्रधानमन्त्रीं नाप मलात
येँ(सन्ध्या टाइम्स)/भारतया न्हू दिल्ली भ्रमणय् वनाच्वंम्ह एमाले अध्यक्ष झलनाथ खनाल व मधेशी जनअधिकार फोरमया नेता उपेन्द्र यादव थौं नेपाः लिहां झायेत्यंगु दुसा वय्कःपिं नेपाः लिहां वयेवं देय्या वर्तमान राजनीतिक समीकरणय् छुं भचा हिलाबुला जुइफुगु अनुमान थन याना हःगु दु ।
थौं नेपाः लिथ्यंम्ह फोरम अध्यक्ष उपेन्द्र यादवं भारतय् वनाः थःपिंसं नेपाःया वर्तमान राजनीतिक अवस्था बारे अनया नेता, बुद्धिजीवी व थीथी सरकारी पदाधिकारीतलिसे सहलह यानागु जानकारी बियादीगु दु। लिसें वय्कलं थ्व भ्रमण लिपा नेपाःया राजनीतिइ याकनं हे छुं कथंया हिउपाः वइगु संकेत नं बियादीगु दु। तर थ्व गज्याःगु हिउपाः धइगु खँ धाःसा वय्कलं कनामदी।
लुमंकेबहः जू, वर्तमान माधव नेपालया सरकारय् फोरमयात नं दुहां वा धकाः आह्वान यायेधुंकूगु दुसा फोरमं उकियात कयाः वार्ता नं शुरु यायेधुंकूगु दु ।
उखे एमाले अध्यक्ष झलनाथ खनाल नं थौं हे नेपाः लिहां झायेत्यंगु दु। माओवादीलिसे सतीम्ह धइगु छबी दुम्ह भाजु खनालयात भारतीय प्रधानमन्त्री मनमोहन सिंह व गठबन्धन अध्यक्ष सोनिया गान्धी निम्हेस्यां नं नापमलाः। सरकारं सःताः सरकार प्रमुखं हे नापमलाःगु खँय् खनालं अपमानवोध याःगु खँ धाःगु दु। वय्कः मनमोहन सिंहयात नापलाये धकाः हे छन्हु अप्वः दिल्लीइ च्वनादीगु खः ।
दिल्ली ला नेपाली राजनीतिया मक्का मदिना खः
दिल्ली भ्रमण क्वचायेकाः थौं नेपाः लिहां झाःम्ह मधेशी जनअधिकार फोरमया अध्यक्ष उपेन्द्र यादवं दिल्ली धइगु ला नेपाली राजनीतिया मक्का मदिना खः धयादीगु दु ।
मुस्मांतय् निंतिं मक्का मदिना धइगु तीर्थस्थल गुलि महत्वपूर्ण जुइगु खः दिल्ली नं नेपाली राजनीतिया लागिं उलि हे महत्वपूर्ण जू धासें दिल्ली मवंकं नेपाःया राजनीति हे थुइके मफइगु बिचाः नं वय्कलं प्वंकादीगु दु ।
थौं दिल्लीं लिहां वयाखतं सञ्चार माध्यमतलिसे खँ ल्हासें वय्कलं थथे धयादीगु खः ।
पुलांम्ह उपप्रधानमन्त्री एवं परराष्ट्र मन्त्री नं जुइधुंकूम्ह नेता यादवं नेपाःया नेतात छाय् धुवांधू दिल्ली ब्वाँय् वनाच्वनीगु धइगु न्ह्यसःया लिसः बिसें दिल्ली नेपाली राजनीतिया तःधंगु तीर्थस्थल जूगु बिचाः प्वंकादीगु खः ।
