बस कुतुं वनाः १६ म्ह सित

प्यंगू सवारी दुर्घटनाय् २० म्हेसिया ज्यान वन

येँ (सन्ध्या टाइम्स)/अर्घाखाँचीया हंसपुर लामभिरे धइगु थासय् थौं सुथय् छगः बस भिरं कुतुं वनाः झिंखुम्ह सीगु दुसा झिंस्वम्ह गम्भीर घाःपाः जूगु दु ।

अर्घाखाँचीया गोखुङ्गां सदरमुकाम सन्धिखर्कपाखे वनाच्वंगु लु. १ ख ३९८७ नम्बरया यात्रुबाहक बस सुथय् ७ बजे हंसपुरय् सतकं कुतुं वनाः उगु दुर्घटना जूगु खः ।

दुर्घटनाय् लानाः गोखुङ्गाया बाबुराम खनाल, नवीन पौडेल, केशावती पौडेल व वया छम्ह मचा, प्रेम पौडेल व वया छय्, मिरा पौडेल व वया मचा सीगु खः ।

अथे हे गोखुङ्गाया हे उमेश खनाल, हंसपुया भूपबहादुर घर्ती मगर, जमुना हमाल, हरिप्रसाद पन्थी, नन्दी घर्ती मगर व गाडी चालक सूर्य बिष्टया लिसें मेपिं निम्ह प्यूठानयापिं हे सीगु दु। घाःपाः जूपिंत सन्धिखर्कय् वासः याकातःगु दु ।

चिब्यागु लँय् यात्रुत क्वकयाः जक गाडी यंकेमाःथाय् यात्रु तयाः हे गाडी यंकूगुलिं दुर्घटना जूगु खँ प्रहरीं धाःगु दु। अन न्हापा न्हापा यात्रु क्वकयाः जक यंकेगु यानातःगु खः ।

उखे बाँकेया अगैया खुसि लिकसं थौं सुथय् निगः बस ल्वानाः छम्ह सीगु दुसा झिंप्यम्ह घाःपाः जूगु दु। उकी लानाः धादिङया यामबहादुर गुरुङ सीगु खः। नेपालगञ्जं येँपाखे वयाच्वंगु ना. ३ ख ९७४७ नम्बरया बसं लँय् दिकातःगु ना. ३ ख ३२२८ नम्बरया बसयात ठक्कर बियाः उगु दुर्घटना जूगु खः ।

उखे मकवानपुरया ज्यामिरे धइगु थासय् मोटरसाइकल ठक्करं छम्ह सीगु दुसा छम्ह घाःपाः जूगु दु। हेटौंडां नारायणघाटपाखे वनाच्वंगु बा. २५ प ३८५३ नम्बरया मोटरसाइकल ठक्करं स्थानीय सावित्री आले मगर सीगु खःसा कान्छीमाया मासाङ्गी घाःपाः जूगु खः ।

दुर्घटनां पोखरा तनावग्रस्त

पोखराय् थौं सुथय् ट्रकया ठक्करं मोटरसाइकलय् च्वनावःपिं निम्ह विद्यार्थी सीवं अनया स्थिति तनावपूर्ण जूवंगु दु। ना. १३ प ४२८५ नम्बरया मोटरसाइकलयात न्यूरोडय् अःखः दिशां वयाच्वंगु लु. १ ख ५७५३ नम्बरया ट्रकं ठक्कर नकेवं स्कूल वनाच्वंपिं पर्वत गुरुङ व विकास छन्त्याल घटनास्थलय् हे मदुगु खः। उपिं न्यूरोडया लक्ष्मी आवासीय उच्च माविइ व्यवस्थापन संकाय अन्तर्गत ११ कक्षाय् ब्वनीपिं खः ।

उमिगु शव पोस्टमार्टमया निंतिं पश्चिमाञ्चल क्षेत्रीय अस्पतालय् तयातःगु दुसा प्रहरीं ट्रक व चालकयात ज्वनातःगु दु ।

घटना लिपा आक्रोशित जूपिं सीपिनि छेँजः, विद्यार्थी व स्थानीय वासिन्दां प्रदर्शन यायेवं प्रहरी व विद्यार्थी दथुइ ल्वापु जूगु दु। प्रदर्शनयात नियन्त्रण यायेत प्रहरीं बागू दर्जनं मल्याक टियर ग्याँस कयेके धुंकूगु दुसां ल्वापु धाःसा दिउगु मदुनि।
उगु प्रदर्शनया झ्वलय् प्रहरीं याःगु लाठीचार्जय् लानाः खुम्ह विद्यार्थी घाःपाः जूगु दुसा उकी मध्ये लक्ष्मी आवासीय विद्यालयया शिक्षक नवराज अधिकारी व विद्यार्थी शिशिर थापा गम्भीर घाःपाः जूगु दु ।

प्रदर्शनकारीतय्सं सभागृह चोक, न्यूरोड व चिप्लेढुंगाय् सवारी आवागमन ठप्प यानाः प्रदर्शन यानाच्वंगु दु। वंगु मंगलवाः जक अन छगः ट्रकया ठक्करं काभ्रे छेँ जुयाः पोखराय् आखः ब्वनाच्वंपिं सीता खवास व जिया खवास नांयापिं तःकेहेँ सीगु खः ।