विवाद ज्यंकाः जक राज्य घोषणा जुइमाः

माओवादीपाखें कन्हय् यायेत्यंगु थीथी जातीय स्वायत्त राज्यया घोषणा ज्याझ्वः स्थगित याःगु दु। माओवादीया थ्व स्थगनं माओवादीया ज्याझ्वः जक मखु आः नेपालं अवलम्बन यायेत्यंगु संघीय प्रणालीयात कयाः हे न्ह्यसः तइपिंत अवसर चूलाःवंगु दु। माओवादीं थ्व ज्याझ्वः स्थगित यायेमाःगुया कारण मेता मखुसें थःगु हे पार्टी दुने ब्वलंगु जातीय प्रदेशतय् सीमा विवाद खः। स्वयम् माओवादीं हे दयेकूगु थीथी प्रदेशया नक्साय् नं नेवाः व तामाङ प्रदेश, लिम्बुवान व खम्बुवान प्रदेश, थरुहट व भेरी-कर्णाली प्रदेश आदि दथुइ सीमाया विवाद दु। माओवादीपाखें थज्याःगु विवाद समाधान मयासे छक्वलं स्वायत्त राज्य घोषणा याना छ्वयेबलय् उकिं तःधंक विवाद पिकाइगु स्वभाविक खः। बरु घोषणा न्ह्यः हे उकी वयेफुगु फुक्क कथंया विवादयात न्ह्यःने तयाः वहस न्ह्याकल धाःसा ल्वापुं तःधंगु रुप काये खनी मखु। उकिं संघीय प्रणालीया औपचारिक घोषणाय् वने न्ह्यः थ्व विवाद समाधान याये हे माः ।

जातीय राज्यया सीमा किटानय् थज्याःगु विवाद वःगुलिं आः संघीय व्यवस्था हे ज्या लगे मजू धाइपिं नं पिहां वयेफु। तर अथे धाःसा मखु। संघीय प्रणाली सरल प्रणाली मखु। थ्वपाखें अप्वः लबः कायेगु खःसा उकियात सही रुपं परिचालन यायेमाः। थीथी जातीय समुदायतय्सं सीमाया छगू विवाद वल धायेवं थवंथवय् ल्वापु हे यानाः क्यने माःगु आवश्यकता मदु। देशय् संघीय व्यवस्था वःगु हे थीथी जातितय्त जुयाच्वंगु दमनया अन्त्य यायेत खः। नापं संघर्ष याःपिं जातीय समुदायत मिले जुयाः थुकियात थःपिंसं हे समाधान याना यंकेमाः ।

More Stories Like this