स्वायत्त राज्य घोषणा स्थगित

घोषणा ज्याझ्वः पूरा तयारी यानाः जक

येँ (सन्ध्या टाइम्स)/एनेकपा (माओवादी) पाखें थ्वहे वइगु कार्तिक २३ गते देय्न्यंकं जातीय स्वायत्त राज्यत घोषणा यायेगु धकाः दयेका तःगु ज्याझ्वः स्थगित याःगु दु। घोषणा ज्याझ्वः आःयात स्थगित धाःसां आः लिपा गबलय् उगु ज्याझ्वः याइ धइगु खँ धाःसा मधाःनि ।

इलामय् वनाच्वंम्ह माओवादी अध्यक्ष प्रचण्डं थौं सुथय् अन छगू पत्रकार सम्मेलन यासें स्वायत्त राज्य घोषणाया ज्याझ्वः स्थगित यानागु जानकारी बियादीगु खः।
स्वायत्त राज्य घोषणायात थःपिंसं प्रचारात्मक रुपं जक यायेगु धकाः ग्वसाः दयेकातयागु खःसां थज्याःगु गम्भीर विषययात प्रचार यायेगु कथं जक काये मजिउ धइगु सुझाव वःगुलिं आःयात स्थगित यानागु जानकारी वय्कलं बियादीगु दु ।

लिपा थुकिया बारे अझ बांलाक तयारी यानाः माल धाःसा स्वायत्त राज्यया पदाधिकारीतय्गु नां समेत पित बीगु कथं घोषणा यायेगु जानकारी नं वय्कलं बियादिल ।

अध्यक्ष प्रचण्ड थौंकन्हय् इलाम वनाच्वंगु खःसां थुकिया बारे निर्णय यायेत माओवादी नेतातय् दथुइ फोन फोनं खँ ल्हानाः सहलह ब्याकूगु खः। अध्यक्ष प्रचण्डं जानकारी बियादी कथं थ्व घोषणा ज्याझ्वःयात अझ बांलाक तयारी यानाः जक न्ह्यःने यंके माली धकाः पार्टी दुने व पिने च्वंपिं नं आपालं शुभचिन्तकतय्सं सुझाव बिउगु खः ।

माओवादीं यायेत्यंगु थ्व घोषणा ज्याझ्वःपाखें आः देशय् समानान्तर सरकार चले जुइगु जुल धकाः सरकार व सरकार समर्थक पार्टीतय्सं द्वपं बियाहःगु खः ।

घोषणा छाय् स्थगित जुल ?

तसकं बय्बय् जुयाच्वंगु माओवादीया जातीय स्वायत्त राज्य घोषणा ज्याझ्वः स्थगित जुइवं जातीय आन्दोलनय् सक्रिय जुयाच्वंगु पुचःत अजूचाःगु दु। उमिसं थ्व ज्याझ्वः स्थगित यायेत माओवादीयात गनं दवाव वल धकाः मालेगु ज्या नं शुरु याना हःगु दु ।

छगू माओवादी सूत्रं धाः कथं पार्टीं थ्व ज्याझ्वः स्थगित याःगुया मू कारण नेवाः प्रदेश व ताम्सालिङ प्रदेश दथुइ ब्वलंगु सीमा विवाद हे खः। तामाङतय्सं भ्वँतय् वयाः स्वायत्त ताम्सालिङ घोषणा यायेगु धकाः ज्याझ्वः दयेकाच्वंगुलिं उकियात स्थगित यायेमाल धकाः नेवाःतय्सं माओवादीयात इनाप याःगु खः। तर तामाङतय्सं माल धाःसा थःपिं येँया स्वयम्भुइ वयाः ताम्सालिङ प्रदेश घोषणा याये धकाः लिसः बियाहःगुलिं थुकिं तःधंगु विवाद पिकाइगु सम्भावना खंकाः ज्याझ्वः हे स्थगित याःगु खँ धाःगु दु।
सूत्रया कथं प्रदेशतय् दथुइ थज्याःगु सीमाया विवाद पूर्वय् लिम्बुवान व खम्बुवान दथुइ नं ब्वलनाच्वंगु दु। उकथं हे पश्चिमय् थरुहट क्षेत्रय् नं थज्याःगु समस्या वयाच्वंगु दु। तराई दुने विवाद ला दुगु हे जुल। आःयात थुपिं समस्या निं समाधान यानाः जक स्वायत्त प्रदेश घोषणा यायेमाली धइगु तायेकाः ज्याझ्वः स्थगित याःगु खः। थुकियात नेवाः बुद्धिजीवीतय्सं लसकुस याःगु दु ।