भारत तंचायेवं तराई क्वात

हाकनं तराई आन्दोलन न्ह्याकेगु ख्याच्वः

चीनलिसे अप्वः सतिउ वन धकाः माओवादी प्रति भारतं तं प्वंका हयेवं सरकारय् दुथ्याःपिं व दुमथ्याःपिं तराईया थीथी संगठनतय्सं नं पुलांगु हे माग ज्वनाः हानं कडा आन्दोलन न्ह्याकेगु ख्याच्वः बियाहःगु दु ।

सरकारय् दुथ्यानाच्वंगु मधेशी जनअधिकार फोरमं गुगुं नं इलय् सरकार त्वःतेफुगु खँ उकुन्हु हे धायेधुंकूगु दुसा वहे खँ हानं हानं लिसा कया हःगु दु । अन दुने भारतप्रति नरम बिचाः तईपं नेतातय्सं सरकार त्वःतेमाः धकाः उकुन्हुं निसें हे दवाव बियाच्वंगु खः ।

उखे सरकारय् मदुसां उकुन्हु तक मौन जुयाच्वंगु तमलोपां नं आः वयाः संघर्ष यायेगु ख्याच्वः बियाहःगु दु । सरकार व संयुक्त मधेशी मोर्चा दथुइ जूगु सहमति पूवंकि धकाः थःपिंसं बियागु अल्टिमेटम थ्वहे पुस १६ गते क्वचाइ धासें यदि अबलय् तकया दुने सरकारं छुं मयात धाःसा थःपिंसं हानं तराई आन्दोलन शुरु यायेगु खँ तमलोपाया नेता ह्दयेष त्रिपाठीं धायेधुंकूगु दु । तमलोपां सरकारयात वंगु लछि न्ह्यः थ्व अल्टिमेटम बिउगु खः ।

उखे थःपिंलिसे सरकारं वार्ता याइगु खः वा मखु निश्चित मदु धासें तराईया सशस्त्र पुचःतय्सं अन मनू स्यायेगु ज्यायात अझ तच्वयेका हःगु दु । अनया संयुक्त जनतान्त्रिक तराई मुक्ति मोर्चालिसे वार्ता यायेत म्हिगः जनकपुर वंगु सरकारी वार्ता पुचः च्वनावंगु विमान मौसमया खराबीं यानाः अवतरण याये मफयेवं वार्ता स्थगित जूगु दु । थ्व वार्ता आः कन्हय् शुक्रवाः जक च्वनीगु सम्भावना दुगु खँ धाःगु दु । थौं उगु पुचःया हे ज्याझ्वः दुगुलिं वार्ताय् च्वने मफइगु खबर छ्वःगु खः ।

थ्वहे झ्वलय् सरकारलिसे वार्ता यायेगु लागिं धकाः तराई जनक्रान्ति पार्टीं थःपिनि वार्ता टोली नीस्वंगु दु । पार्टी नेता अनुरागया नेतृत्वय् थ्व वार्ता टोली नीस्वंगु खः तर सरकारं धाःसा थ्व पुचःलिसे गबलय् वार्ता याइगु खः छुं सी मदुनि ।

भारत व माओवादीया स्वापू स्यनेगु शुरु जुइवं तराईया राजनीतिक पार्टीत सनाहःगुलिं आः सरकार क्वःथलेगु लागिं जुयाच्वंगु राजनीतिक कासायात भारतं नं साथ बीगु अनुमान जुयावःगु दु ।