साकाहारीयात भेदभाव ?

शान्तरत्न शाक्य

ओलम्पस क्लब, ओमबाहाःपाखें नेपाल संवत् न्हूदँया लसताय् 'भिंतुना तुच्चा' ज्याझ्वः न्ह्याका वयाच्वंगु झ्वलय् थुगु दँय् नं प्रा. सुवर्ण शाक्यजुया ई पुलांगु बाखंत माःहनाः 'माःचाः' नांगु बाखं सफू पिथनेगु ज्या लिसे 'भिंतुना तुच्चा'या ग्वसाः तःजिक जूगुली थःगु ब्वति क्यनेगु ह्वःताः चूलाःगु जुल। बाखं सफूया उलेज्या, न्हूदँ समारोह समितिया न्हूम्ह नायः तीर्थराम डंगोलजुं याःगु जुल ।

ज्याझ्वःस नेपालभाषा बाखं विधा साहित्य ख्यःया ख्वाः दुपिं बाखं च्वमिपिं न्ह्यथने बहः जुइक उपस्थिति क्यंगु उगु ज्याझ्वलय् क्लबयापाखें नकतिनि क्वचायेकूगु 'आधारभूत प्राथमिक उपचार सेवा तालिम' य् ब्वति काःपिंत लुमन्ति चिं लःल्हायेगु ज्याझ्वः घानातःगुलिं ज्याझ्वः स्थलय् विशेष चहलपहल दुगु जुल। चहलपहल दथुइ पाहांपिंपाखें मन्तुना प्वंके ज्या नं न्ह्यानाच्वंगुली 'मन्तुना' मन तयेक न्यँन्यं चाहे जूपिंत भचा पंगल याःसां ज्याझ्वः चाहिं न्ह्याइपुक हे क्वचाःगु जुल ।

मूपाहाँ भाजु तीर्थराम डंगोलं मन्तुना प्वंकेगु झ्वलय् धाल - 'झीपिं छपाः लप्तें चायेकेमाःपिं खः। क्लबं उकिया निरन्तरता बिउगु दः बांलाः हे ताल। थ्व झीगु मौलिक परम्परा खः। थुकियात संरक्षण व संवर्द्धन याये हे माः।' वय्कःया मन्तुना न्यनाच्वंपिं मन दुपिंसं ल्हाःपाः थात। मंमदुपिं सुम्क च्वनाछ्वत ।

स्वन्ति लक्ष्मीपुजा जःखःया ज्याझ्वः जूगुलिं महाकवि लक्ष्मीप्रसाद देवकोटाया धुमधामं शतवार्षिकी न्यायेकाच्वंगु इलय् महाकवि बारे वय्कलं छुं खँ चर्चा यायेगु उचित हे तायेकूगु खनेदु। वय्कलं महाकवि लक्ष्मीप्रसाद देवकोटाया बहुचर्चित, बहुप्रचारित 'मुनामदन' खण्डकाव्य वय्कःया मौलिक रचना मखु, थ्व नेपालभाषा पद्य साहित्यया 'जि वया ला लच्छि मदुनि, छि काय ! सँदेय् झाय् धइदिल' या फोटो कपी खः' धासें छगू सत्य तथ्य खँया पर्दाफास यानादिल।
ख्वाः दुपिं ततःधंपिं झी साहित्यिक महारथिपिंसं सः तयेगु मयाःगु वय्कःया म्हुतुं न्यनाः जितः सुखद् अनुभूति जुल। अथे हे सः भगवान बुद्धयात देछायातःगु, मल्वःगु, अमर्यादितगु व झीगु भासं धायेगु खःसा सय्बय् मदुगु 'राष्ट्रिय विभूति' उपाधिपाखें बुद्धयात सम्मानपूर्वक मुक्त यायेमाःगुलिइ नं तयेमाःगु दु। विश्वया मर्यादित महामानव बुद्धयात छम्ह पर्वतारोही, छम्ह कलाकार, छम्ह संवत्कार सरह राष्ट्रिय विभूति' धकाः छाय्पीगु उचित मजू। ससम्मान उपाधि लित कायेमाः। थुकी पहल यायेमाःगु खनेदु।
'माःचाः' बाखं सफू बारे समालोचकीय ढंगं, मिसा पात्रत व्यापक छ्यला व बाखं सफू दुनेया गुपु बाखंया बारे थःथःगु ढंगं मनं खनाः थेंया मन्तुनाया बसा लाये ज्या अन रोचक ढंगं जूगु हे जुल। बाखं सफू दुने च्वंगु बाखंया सवाः कायेगु खःसा छगू छगू प्रति बाखं सफू न्यानाः स्वयेत इनाप दु। मू थिके मजू। 'शरणं' नांया च्वमिया भजन सीडी छचाः फ्री दु। व अर्थय् सफू सितिकं लाःगु दु ।

ज्याझ्वः इलं हे क्वचाल। पाहांपिं तुच्चा यायेथाय् झ्वः छू वन। जि नं झ्वः छुइत दना ।

झीसं सिउ, तुच्चा धायेवं- हाकुमुस्या, पालु, भुति, आलुघासा, सनां (अचार), हाकु छ्वय्ला दइगु। अन ला ख्येँय् बागः नं दुगु जुयाच्वन। जि शाकाहारी। जि हुलं घ्वाकाः तुच्चा भाग काः वनेम्वाः। शाकाहारी तुच्चा ब्यागलं छखेलिक १५/२० भागति ब्वयातःगु दु। जिं छगू भाग कया हयाः छखेलिक फलय् दंवया ।

तुच्चा चिपं थी न्ह्यः जिगु लिक्क च्वंम्हेसिगु ब्वय् मिखा जुत। धात्थें वइगु ब्वय् ख्येँय् बागः, हाकु छ्वय्ला, भुति, आलु, सनां सकतां परिपक्व जुइक दु। जिगु ब्वय् एकदम साधारण जक दु। ला ख्येंय् मनःपिंगु निंतिं धकाः 'सब्सीच्यूड' कथं छुं छताया व्यवस्था यानातःगु मदु। अथे जूबलय् जितः हीनताबोध जूथें जुल। अपहेलित, हेय याःथें ताल। जि नं इलय् वयाः ई क्वमचाःतले ईल्वहं थें फिरिक्क मसँसे ज्याझ्वः ज्वःछिं च्वनाः ज्याझ्वःयात तिबः बियाच्वनाम्ह खः। छ्यं ग्वलं खाये थें जक वयाच्वनाम्ह ला जि मखु। धाःसा ला, ख्येँ मनःपिं जुइवं उमित असमान व्यवहार छाय्? समावेशी, समानता, सह अस्तित्वया बारे भाषण झी यायेसः, सतकय् संघर्ष यायेसः। तर व्यवहारय् यल, ख्वप थें पाक्क व्यवहार छाय् याइगु? जिगु थ्व न्ह्यसःया लिसः पियाच्वना ।

मनया असन्तुष्टि व अन्तरबोधया खँ च्वयेत जितः बाध्य जुइका बिल। च्वया। अन्यथा मतायेत इनाप दु। ओलम्पस क्लबया भ्वछिसितं जिगु नं न्हूदँया भिंतुना दु ।

More Stories Like this