मंकाः नेतृत्वया लँय् नेपाली कांग्रेस

नेपाली कांग्रेस ठोस निर्णय मयाइगु पार्टी ला मखु तर न्ह्याबलें लिपा हे जक याइगु पार्टी खः। आः पार्टीयात मंकाः नेतृत्वय् यंकेगु धकाः जूगु निर्णय नं लिबाक हे जक जूगु दु। तःधंगु पार्टीत मध्ये माओवादी व एमालें नकतिनि मंकाः नेतृत्वय् वनेगु धकाः निर्णय याःगु खःसा थ्वयां लिपा आः कांग्रेसं नं वहे निर्णय याःगु दु ।

नेपाली कांग्रेस प्रजातन्त्रवादी सिद्धान्त ज्वनाः नं तानाशाही शैलीं न्ह्याना वयाच्वंगु पार्टी खः। थज्याःगु पार्टीं मंकाः नेतृत्व व बहुबिचाःयात थाय् बियाः पार्टी सञ्चालन यायेगु विधियात अःपुक नाला मकाइगु स्वाभाविक खः। पार्टी सभापति गिरिजाप्रसाद कोइराला ला अझ नं मंकाः नेतृत्व प्रणालीया विरोधय् हे दनि। वय्कलं थ्व प्रणाली संस्थापक नेता वीपी कोइरालां स्वनाथकूगु जूगुलिं उकियात हीके मजिउ धइगु अडान समेत कयादीगु दु। तर वय्कलं लुमंकेमाःगु खँ छु धायेबलय् थौं नेपाः वीपीकालीन नेपाः मखेधुंकल। वीपीं अबलय् कल्पना मयाःगु आपालं घटना थौं देशय् घटित जुइधुंकूगु दु। उकिं ई कथं न्ह्यायेमाःगु थौंया आवश्यकता खः। कोइराला व वय्कःया पार्टीं वीपीपाखें धाथें सयेकेमाःगु खँ ला देश व जनता प्रतिया इमान्दारिता व मुलुक न्ह्याकेगु निष्ठापूर्ण प्रतिवद्धता खः। वीपीया थज्याःगु आदर्शयात वास्ता मयाइम्ह कोइरालां थौं सभापति प्रणाली छगू बचे यायेगु लागिं वीपीया 'दुहाई' बीगु हास्यास्पद सिबाय् छुं मखु। कांग्रेस पार्टी कोइराला लिपा नं न्ह्यायेमाःगु दनि। थ्व खँयात लुमंकाः न्हूगु पुस्तां याःगु निर्णययात शिरोपर यायेगु हे वय्कःया लागिं भिं जुइ। लिसें पार्टी दुने कुहां वनाच्वंगु थःगु साखयात नं वय्कलं ध्यान बीमाःगु आवश्यकता दु ।

More Stories Like this