उजुरी वयेगु हे बन्द

संसदीय सुनुवाई बेकार जूगुया लिच्वः / राजदूतया संसदीय सुनुवाई

येँ (सन्ध्या टाइम्स)/सरकारं नियुक्त याइपिं थीथी देशया राजदूततय् विषयय् संसदीय सुनुवाई समितिइ आः उजुरी लायेगु हे बन्द जूगु दु। थौंकन्हय् सरकारं थीथी स्वंगू देय्या निंतिं नेपाली राजदूत नियुक्त यानातःगु दुसा उमिगु बारे संसदीय सुनुवाई समितिइ सुनुवाईया निंतिं प्रक्रिया न्ह्याकाच्वंगु दु। तर उपिं मध्येय् सुं छम्हेसिगु हे बारे उजुरी मलाःगुलिं सुनुवाई हे यायेम्वाःलीगु अवस्था वयेत्यंगु खँ धाःगु दु ।

सरकारं नियुक्त याइपिं सुं नं राजदूतया बारे उजुरी ला हे लाःसां नं संसदीय सुनुवाई समितिं सामान्य न्यनेकने जक यानाः सफाई बियाः नियुक्तियात हे मान्यता बीगु कारणं अन उजुरी तयाया छुं हे अर्थ मदु धकाः सुनां नं उजुरी मतःगु खः ।

संसदीय समितिया चलन कथं अन सुयां नं बारे उजुरी वल धाःसा उकियात कयाः छलफल जुइबलय् फुकस्यां विरोध याःसां नं यदि छम्ह जक दुजलं समर्थन यात धाःसां नं उकियात मान्यता बीगु याइ। थ्व चलनं यानाः समितिइ सुयां बारे वहस यायेगु हे निरर्थक जुइगु तायेकाः सुनुवाई यायेमाःपिं सभासद्तय्सं हे अन वनेगु त्वःता हयेधुंकूगु दु। सभासद्तय्सं सुनुवाईयात छगू नाटक जक तायेकाच्वंगु दु। संसदीय सुनुवाईलय् आः तक सकलें दुजः सभासद्तय् छगू हे मत जूगु विषय धइगु सरकारं नियुक्त याःगु क्यानाडाया राजदूतय् खः। क्यानाडाय् नेपाःया राजदूतावास हे मदुसां नं सरकारं अनया राजदूत कथं पुलांम्ह मुख्य सचिव भोजराज घिमिरेयात नियुक्त यायेवं संसदीय सुनुवाई समितिं वहस हे बहिष्कार यासें सरकारया विरोध याःगु खः। अमेरिकाया निंतिं राजदूत नियुक्त याःम्ह सुरेशराज प्रधानया विरुद्ध चीनं वःगु गोप्य दस्तावेज सार्वजनिक याःम्ह धकाः अबलय् माओवादी सभासद्तय्सं तसकं विरोध याःगु खःसां वय्कःया नियुक्ति धाःसा प्रभावित मजूगु खः ।

थौंकन्हय् संसदीय सुनुवाईया लागिं दक्षिण अफ्रिकाया अरुणप्रसाद धिताल, बेलायतया सुरेश चालिसे व इजिप्टया श्यामलाल तकदारपिनि नां वनाच्वंगु दु। उकी मध्ये धितालया विषयय् उजुरी तयेगु म्याद हे फुइधुंकूगु दुसा मेपिनि म्याद २२ गते तक दनिसां उजुरी धाःसा आः तक छगू हे वःगु मदुनि। सूत्रया कथं वय्कःपिनि बारे उजुरी हे तयेगु मदयाः सिबें तयाया फाइदा मदुगुलिं उजुरी मवःगु खः ।