प्रदेशया सीमा निर्धारण विवाद

देशय् संघीय व्यवस्था लागू जुइबलय् निगू बिस्कं प्रदेशया रुपय् अस्तित्वय् वयेत्यंगु नेवाः प्रदेश व ताम्सालिङ प्रदेश दथुइ दुनें दुनें ब्वलनाच्वंगु कचवं सतहलय् पिहां वःगु दु। माओवादीपाखें आः यायेत्यंगु नेवाः स्वायत्त राज्य व ताम्सालिङ स्वायत्त राज्य घोषणाया ज्याझ्वलय् थ्व विवाद पिहां वःगु खः। खास यानाः उत्तर लागाय् लाःगु भ्वँत, पन्ति, धौख्यः आदि लागा ताम्सालिङ लागाय् लाः धकाः तामाङतय्सं यानाच्वंगु दावीयात नेवाःतय्सं विरोध यानाच्वंगु दु। तर थ्व विरोधया वावजूद नं कार्तिक २३ गते भ्वँतय् हे वयाः ताम्सालिङ स्वायत्त प्रदेश घोषणा यायेगु ज्याझ्वः सार्वजनिक याःगुलिं थ्व विवाद आः सतहलय् खने दयेकः वःगु खः। खतुं थीथी प्रदेश निर्माणया इलय् मेमेगु प्रदेशय् नं सीमा सम्बन्धी थज्याःगु विवाद पिहां वइगु सम्भावना उतिकं दनि। उकिं थ्व मामिलाय् आवंनिसें हे संवाद न्ह्याकाः समस्याया निराकरण याना तयेमाःगु आवश्यकता दु। कन्हय् प्रदेश निर्माण याये त्ययेकाः तसकं लिबायेधुंकूगु ई जुइफु। यदि सीमाया खँय् ल्वापु पिहां वल व उकिं मेगु असहज अवस्था ब्वलंकल धाःसा उकिं संघीय व्यवस्था विरोधीतय्त धायेगु थाय् दयेका बी। लिसें संघीय व्यवस्थायात हे असफल याना बीगु खतरा तकं पिकया बी। यदि गुगुं लागा गुगु प्रदेशय् तयेगु धइगु विवाद पिहां वल धाःसा उगु लागाया ऐतिहासिक, सांस्कृतिक दस्तावेजत स्वयेगु ला द हे दु, यदि उकिं नं मजिल धाःसा अन च्वंपिं जनताया दथुइ जनमत संग्रह यानाः नं समस्या ज्यंके जिउ। जनमत संग्रह दकलय् प्रजातान्त्रिक व स्वीकार्य लँपु खः। थ्व बारे आः हे सहमति दयेकेगु कुतः न्ह्याकेमाः ।

More Stories Like this