अमेरिकाय् म्हपुजा

न्हापा न्हापा जूसा नेपाः त्वःताः छगू पहाड जक पुलाः वंसां नेवाःतय्सं थःगु भाय् व संस्कृति त्वःतेगु शुरु याइ। गुकिं यानाः थौं नेपाः दुने हे च्वनाः नं स्वनिगलं पिनेया जिल्लाय् बसोबास याइपिं आपालं नेवाःतय्सं थःपिनि भाय् व संस्कृति ल्वःमंकेधुंकूगु दु। तर इच्छाशक्ति दत धाःसा न्ह्याक्व हे तापाक च्वंसां नं मनूतय्सं थःपिनि संस्कृति व भाय् म्वाकेगु ज्या धाःसा याना हे च्वने फइगु जुयाच्वन। गथे कि थौंकन्हय् अमेरिकाय् वंगु छुं दँ न्ह्यवंनिसें म्हपुजा न्यायेकेगु याना वयाच्वंगु दु। दँय्दसं थें थुगुसी नं अन म्हपुजा न्यायेकेगु ज्या जुल ।

नेवाः अर्गनाइजेशन अफ अमेरिका (एनओए) या नायः राजेश श्रेष्ठया छेँय् वंगु म्हपुजा कुन्हु उगु मंकाः म्हपुजा ज्याझ्वः जूगु खः। ज्याझ्वः एनओएपाखें सञ्चालित ल्यांग्वेज सेन्टरया ग्वसालय् जूगु खः।
अमेरिकाया वाशिंगटन डीसी मेट्रोपोलिटन लागाय् च्वंपिं सछिम्ह नेवाः व छुं गैरनेवाःतय्सं नं उगु मंकाः म्हपुजाय् ब्वति काःगु खः ।

म्हपुजाया लागिं मुक्कं १०५ पाः मन्दः च्वःगु खः। थुकी ल्यांग्वेज सन्टरलिसे आवद्ध मस्तय्सं ब्वति काःगु खः। सनिलंनिसें करिब ४ घण्टा बिकाः म्हपुजा सम्पन्न जुल।
पुजाय् नेवाः परम्परा कथं ख्यें सगं कायेगु निसें लप्तेय् तयाः भ्वय् नयेगु ज्या नं जूगु खः। लप्तेभ्वजं सकसितं थःगु मांदेय् लुमंकाबिल ।

उगु ज्याझ्वलय् पाहां कथं नेपालं बिज्याःम्ह सभासद् भिक्षु आनन्द व द्यःभाजु बासभ राजोपाध्यायपिंसं ब्वति कयादीगु खः। ज्याझ्वलय् भिक्षु आनन्दं म्हपुजाया धार्मिक व आध्यात्मिक दर्शनया बारे ध्वाथुइका बिज्याःगु खःसा द्यःभाजु राजोपाध्यायं म्हपुजाय् याइगु छता छता ज्याया बारे ब्याख्या यानाः उकिया अर्थ थुइकादीगु खः। थुकिं म्हपुजाय् ब्वति काः वःपिं सकलें प्रभावित जूगु खः ।

ज्याझ्वलय् एनओए नायः राजेश श्रेष्ठं सकसितं लसकुस यानादीगु खःसा उकिया ल्यांग्वेज सेन्टरया सभापति ईश्वर राजभण्डारीं म्हपुजा व थःपिंसं यानाच्वनागु ज्याझ्वः बारे कनादीगु खः ।

उगु ज्याझ्वः खास यानाः अमेरिकाय् बसोबास यानाच्वंपिं नेवाःतय् मस्तय्सं थःपिनि संस्कृति संस्कार मत्वःतेमा धइगु उद्देश्य तयाः याःगु खः। थ्व हे ताः तयाः एनओएया ल्यांग्वेज सेन्टरं अन च्वंपिं नेवाः मस्तय्त नेवाः भाय् स्यनेगु ज्या नं यानाच्वंगु दु ।

आः न्हूदँ ज्याझ्वः

म्हपुजा ज्याझ्वः लिपा आः मेगु वालय् नेपाल संवत्या न्हूदँ ११३० या लसताय् नेवाः अर्गनाइजेशन अफ अमेरिकापाखें छगू ज्याझ्वः नं यायेत्यंगु दु। थ्वहे वइगु कछलागा १३ (नोभेम्बर १४ तारिख) कुन्हु वाशिंगटनस्थित सिल्भर स्क्रिनय् जुइगु उगु ज्याझ्वलय् नेवाः परम्परा कथं समय् बजि नयेगु नापं हुलाप्याखं व म्येँ हालेगु ज्याझ्वः नं जुइ ।

More Stories Like this