हानं शुरु जूगु नेतातय दिल्ली दौड

देशय् राजनीतिक अस्थिरता ब्वलनाः सरकार जक मखु राज्यसत्ता हे डाँवाडोल जुयाच्वंगु इलय् लाक्क नेपाःया थीथी प्रमुख राजनीतिक पार्टीया शीर्ष नेतातय् 'दिल्ली दौड' शुरु जूगु दु। माओवादीं आन्दोलन यायेगु धकाः घोषणा यायेवं नेपाली कांग्रेसया शेरबहादुर देउवा, राजपाया सूर्यबहादुर थापा जुयाः आः एमालेया झलनाथ खनाल व फोरमया उपेन्द्र यादवं तक थ्व 'दौड'यात निरन्तरता बिउगु दु। नेपालय् छुं नं कथंया हिउपाः हयेत वा वयेत्यंगु हिउपाःयात दिकेत दकलय् न्हापां न्हू दिल्लीया अनुमति कायेमाःगु पुलांगु परम्परां थुगुसी छक्वः हाकनं थाय् काल। माओवादीं सरकार परिवर्तन यानाः थःगु नेतृत्वय् राष्ट्रिय सरकार गठन याये दयेमाः धकाः याःगु आन्दोलन लिपा उकियात गय् यानाः संवोधन यायेगु धइगु जिम्मेवारी राजनीतिक पार्टीतय्त वयाच्वंगु खः। तर उगु जिम्मेवारी थम्हं हे स्वतन्त्र रुपं पूवंकेगु पलेसा उकिया बारे छु याःसा जी धकाः बिचाः कायेत देय्या वरिष्ठ नेतात न्हू दिल्ली निं ब्वाँय् जुयाच्वंगु दु। नेपालय् छुं नं कथंया तःधंगु निर्णय कायेत न्हूदिल्लीया पूर्व स्वीकृति कायेमाःगु थ्व औपनिवेशवादी परम्परा वर्तमान लोकतान्त्रिक नेपाःयात मल्वः धकाः न्ह्याक्व हे धायेगु याःसां उकियात चीकेगु आँट धाःसा थौं तक सुनां याये मफुनि। देय्या राजनीतिक पार्टीतय्के थज्याःगु मनोवृत्ति दयाच्वंत्तले देय् लोकतान्त्रिक, गणतान्त्रिक, संघीय आदि आदि न्ह्यागु हे रुपय् रुपान्तरण जूसां स्वतन्त्र व स्वाधीन जुइगु लक्षण धाःसा खने मदु। न्हूगु संविधान वःसां उकिं नेपाली जनतायात स्वतन्त्र नागरिक दयेकी धइगु खँय् आशंका पिकया बिउगु दु ।

More Stories Like this