भारतया संकेत गुखे ?
भारतीय माओवादीयात नेपाली माओवादीया ल्वाभः
नेपालय् जनयुद्ध क्वचायेसातकि भारतय् शुरु जूगु संयोग जक खः ला ?
येँ (सन्ध्या टाइम्स)/भारतय् थौंकन्हय् तच्वया वंगु माओवादी आन्दोलनयात नेपाःपाखें नं ल्वाभः वनाच्वंगु खनेदु धकाः छुं न्हि न्ह्यः भारतया गृहमन्त्री पी. चिदाम्बरमं दावी यानादीसां गुगु देशया ल्वाभः नेपाः जुयाः भारत वनाच्वन धइगु खँ धाःसा वय्कलं कनामदी। थुकिं यानाः छगू न्ह्यसः पिहां वःगु दु - आखिर भारतया संकेत गुखे खः?
नेपालय् माओवादी जनयुद्ध तच्वयाच्वंगु इलय् भारतीय माओवादीतय् गतिविधि करिब शुन्य अवस्थाय् थ्यनाच्वंगु खः। आः नेपाली माओवादीया जनयुद्ध क्वचाये सातकि भारतय् चर्के जुया वःगुलिं गनं नेपाःया माओवादीतय्सं थःपिंत म्वाःगु ल्वाभः फुक्कं भारतीय माओवादीयात जकं बिउगु खः लाकि धइगु आशंका भारतया छुं विज्ञतय्सं यानाच्वंगु दु।
खतुं नेपालय् माओवादीया जनयुद्ध बन्द जुइसातकि उमिसं थःपिनि ल्वाभः फुक्क अनमिनया रोहवरय् बन्द क्वथाय् थन्के याःगु खः। तर अबलय् माओवादीं ल्वाभः लःल्हानाच्वंगु इलय् छुं विशिष्ट मनूतय्सं जनयुद्धया इलय् माओवादीं गुलि ग्यानापुगु ल्वाभःत पिकाःगु खः व छपु हे लःमल्हाः, व ल्वाभः फुक्क मेथाय् हे सुचुका तःगु दु धकाः नं द्वपं बियाहःगु खः। माओवादीं अनमिनयात लःल्हाःगु ल्वाभः फुक्क भ्वाथःगु जक जूगुलिं बांलाःगु ल्वाभःत गनं सुरक्षित यानातःगु दयेमाः धइगु विश्लेषण अबलय् पिहां वःगु खः। माओवादीं अबलय् सुरक्षित यानातःगु वहे ल्वाभः जकं आः भारतीय माओवादीया ल्हातय् लाः वंगु मखु ला धइगु आशंका भारतया विज्ञतय्सं यानाच्वंगु खँ सूत्रं धाःगु दु ।
भारतीय गृह मन्त्री चिदाम्बरमं नेपाःया लँ जुयाः भारतीय माओवादीतय् थाय् ल्वाभः थ्यनाच्वंगु दु धाःसां व ल्वाभः पाकिस्तानं वःगु धाःसा मखु धकाः नं धयादीगु दु। यदि नेपाःया लँ जुयाः पाकिस्तानया ल्वाभः वःगु मखुसा गनयागु ल्वाभः वःगु ले? स्पष्ट दु, चीनयागु ल्वाभः वःगु जुइमाः। भारतं तप्यंक चीनया नां मकाःसां संकेत धाःसा उखे हे बिउगु दु ।
लुमंकेबहः जू, नेपाःया माओवादीतय्सं नं थःपिनि जनयुद्धया इलय् अप्वः यानाः चिनियाँ ल्वाभः हे प्रयोग याःगु खः। तर माओवादीं अनमिनयात लःल्हाःगु अप्वः ल्वाभः नेपाःया हे प्रहरी व सेनापाखें लुटे यानाः यंकातःगु जक दु धकाः नं द्वपं बीगु याः ।
