रवि डंगोलया व मिसा

नेपाल टेलिभिजनया पर्दाय् 'तितो सत्य' नांयागु सिरियलय् 'का बेमान' धकाः म्हसीका दुम्ह नांजाःम्ह कलाकार रवि डंगोलया निर्देशनय् दयेकेत्यंगु न्हूगु नेवाः संकिपा 'व मिसा' या भिं साइत ज्याझ्वः यलया त्यागलय् म्हिगः जुल। वरिष्ठ पत्रकार व नेपाः जागरण संकिपा मञ्चया प्रमुख विजयरत्न असंबरेया प्रमुख आतिथ्यताय् जूगु उगु भिं साइत ज्याझ्वलय् भाजु असबरें साइतया निंतिं क्ल्याप बियादीगु खःसा उगु क्ल्याप ज्याझ्वःया निर्देशन देवकुमार श्रेष्ठं यानादीगु खः ।

ग्वार्को युथ एशोसियसन नांयागु छगू पुचःपाखें दयेकेत्यंगु 'व मिसा' दुने छम्ह मिसाया जीवनय् वइगु थीथी हाथ्यायात न्ह्यब्वयातःगु दु। सुरेश किरणं च्वयादीगु बाखनय् आधारित थुगु संकिपाय् दुर्गालाल श्रेष्ठ, निर्मलरत्न शाक्य व सुरेश किरणं म्येँ च्वयादीगु दुसा गुज्य मालाकार, मनराजा नकःमि व विजेन श्रेष्ठपिंसं उकी संगीत तयादीत्यंगु दु। अष्ट महर्जनं फाइट डाइरेक्सन याइगु थ्व संकिपाय् जितेन्द्र श्रेष्ठया सह-निर्देशन दुसा भावना महर्जनं ड्रेस डिजाइन यानादी।
स्वनिगःया थीथी थाय्या नापनापं स्वनिगलं पिने पन्ती (काभ्रे) व सौराहा जंगल (चितवन)य् नं शुटिंग जुइगु 'व मिसा' दुने नरोत्तम मानन्धर हिरो व बिनिता महर्जन हिरोइनया रुपय् खने दइसा सुशील राजोपाध्याय, मन्जू श्रेष्ठ, पल्पसा डंगोल, जगत श्रेष्ठ, अन्नपूर्णेश्वरी श्रेष्ठ, श्याम सुन्दर शिल्पकार, अर्नेश्वरी शिल्पकार, अमिता ताम्राकार, राजु शाक्य, रत्नकाजी लूनिभाया नापनापं निर्मल शर्मा (गैंडा), उत्तम के.सी व श्याम राई थेंज्याःपिं नादंपिं गैर नेवाः कलाकारतय्गु नं अभिनय स्वये दइ ।

पटकथा व संवाद रवि डंगोलं हे च्वयादीगु थुगु संकिपा वइगु खुलाया दुने तयार जुइगु आशा वय्कलं यानादीगु दु। थौंकन्हय् वयाच्वंगु नेवाः फिल्मत स्वयां छुं भचा पाक्क व फरक सवाः वयेक थ्व प्याखं दयेकेत स्वयाच्वनागु खँ नं वय्कलं कनादिल ।

More Stories Like this