हानं शुरु जुल दिल्ली दौड
अस्थिरताया नापनापं भारतया रुची अप्वल
येँ (सन्ध्या टाइम्स)/देय्या राजनीतिक अवस्था धमाधम स्यना वनाच्वंगु इलय् लाक्क उखे विदेशी शक्तितय् रुची नं खने दयेक व मदयेक अप्वया वःगु दु। माओवादी आन्दोलन, सरकार हिलेगु खँ, प्रधानमन्त्रीया राजीनामाया चर्चा आदिया दथुइ सत्तारुढ पार्टी एमालेया अध्यक्ष झलनाथ खनालं थौं दिल्ली भ्रमण यानादीत्यंगु दु। भारतीय प्रधानमन्त्री मनमोहन सिंहया ब्वनाय् वय्कः भारत झायेत्यंगु खःसां वय्कःया थ्व भ्रमणया ज्याझ्वः धाःसा एमालेया मेम्ह नेता खड्ग ओलीया च्यानलं मिले याःगु खँ सूत्रं धाःगु दु। भाजु ओली नं छुं ई न्ह्यः तिनि न्हू दिल्लीया भ्रमण यानाः लिहां वःम्ह खः। अध्यक्ष खनालं भारतय् प्रम मनमोहन सिंह लगायत सोनिया गान्धी व भारतीय राजनीतिया प्रमुख नेतातय्त नापलानादीगु ग्वसाः दु ।
उखे माओवादी नापं थःपिंसं नं आन्दोलन यायेगु धकाः घोषणा याःम्ह मधेशी जनअधिकार फोरमया नायः उपेन्द्र यादव नं थौं भारत झायेत्यंगु दु ।
सूत्रतय्सं अनुमान याः कथं एमाले अध्यक्ष खनालया भारत भ्रमण लिपा सरकार व माओवादीया बारे एमालेपाखें छुं ठोस निर्णय यायेफु ।
भारतीय नेतातय्सं आःया सन्दर्भय् माधव नेपालया सरकार हे टिके यायेमाः व उकी माओवादीयात नं समावेश यानाः फुसा राष्ट्रिय सरकार दयेकेमाः धकाः राय बीगु यानाच्वंगु कुटनीतिक सूत्रतय् दावी दु ।
तर भारतया थज्याःगु बिचाः दुसां आः नकतिनि संयुक्त राष्ट्र संघया महासचिव वान की मुनं नेपालय् छुं छगू पार्टी याकःचिया सरकार सिबें सकलें दुथ्याःगु राष्ट्रिय सरकार आवश्यक जू धकाः बियादीगु बिचारं यानाः नं देय्या राजनीति वृत्तय् तरंग हया बिउगु दु ।
देशया राजनीतिक स्थिति स्यना वनाच्वंगु हे इलय् छुं न्हि न्ह्यः तिनि नेपाली कांग्रेसया वरिष्ठ नेता शेरबहादुर देउवा न्हू दिल्ली वनाः लिहां वःगु खः। वयां लिपा नेपाःया राजनीतिइ भारतया लाइन हइम्ह धकाः नांजाःम्ह राजपाया अध्यक्ष सूर्यबहादुर थापा न्हू दिल्ली वंगु खः ।
आः झलनाथ खनाल लिपा माओवादी अध्यक्ष प्रचण्डं नं न्हू दिल्ली भ्रमण यायेगु तयारी यानाच्वंगु दु। चीन भ्रमण लिपा हे प्रचण्डं थम्हं याकनं हे भारतया नं भ्रमण यायेगु घोषणा यानादीगु खः ।
माओवादीपाखें सरकार हे क्वःथलेगु कथंया आन्दोलन शुरु यायेवं आः सरकार परिवर्तन यायेगु खःसा वयां लिपा सुयागु नेतृत्वय् गय् यानाः न्हूगु सरकार दयेकेमाली धइगु विषयय् भारतय् सल्लाह जुयाच्वंगु अनुमान सूत्रं याःगु दु ।
