संविधानसभा भंग यायेगु षडयन्त्र
जनतां तःधंगु बलिदान व योगदान बियाः खडा याःगु संविधानसभापाखें आः देय्या न्हूगु संविधान दयेकाः नइ धकाः स्वयम् राजनीतिक पार्टीतय्सं हे पत्याः यायेगु त्वःता हःगु दु। छखे संविधानसभां यानाच्वंगु ज्या व मेखे संविधानसभायात क्रियाशील यायेमाःपिं राजनीतिक पार्टीतय्सं म्हिताच्वंगु भूमिका स्वयेबलय् आः ल्यं दुगु न्हय्लाया दुने संविधानसभाया गर्भं न्हूगु संविधान जन्म जुइ धकाः आशा यायेगु थाय् बुलुहुँ म्हो जुया वनाच्वंगु धाथेंया यथार्थ नं खः। उकिं आः थज्याःगु अवस्थाय् राजनीतिक पार्टीतय्सं गुकथं ज्या न्ह्याकेमाली धकाः बिचाः यायेमाःगु तःधंगु हे आवश्यकता दु ।
थ्वहे इलय् संविधानसभायाके मदया वनाच्वंगु ईयात ध्यानय् तयाः आः संविधानसभा हे भंग यायेगु व उकिया थासय् चीधंगु संविधान आयोग दयेकाः अनं हे संविधान तयार यायेगु 'कोठे षडयन्त्र' जुयाच्वंगु खँ पिहां वःगु दु। संविधानसभा भंग यानाः संविधान आयोग दयेकेगु सोच वास्तवय् न्हूगु वर्तमान संविधानसभा प्रति याःगु छगू तःधंगु अविश्वास खः। तर संविधानसभा भंग यानाः मेगु छुं उपायपाखें संविधान दयेकल धाःसा उकियात जनतां गुगुं हे हालतय् स्वीकार मयाइगु खँयात धाःसा राजनीतिक पार्टीतय्सं बिचाः मयासें मगाः। थ्व खः कि ई गाक्कं म्हो जुइधुंकल। तर उकिया अर्थ थ्व मखु कि संविधानसभा हे भंग यानाछ्व। संविधान च्वयेगु ज्याय् जनताया सहभागिता दयेमा धकाः संविधानसभाया कल्पना जूगु खः। यदि उकियात हे भंग यानाः संविधान दयेकल धाःसा व पार्टीतय् खल्तीं पिहां वःगु संविधान जुइ। खल्तीया संविधान जनतां स्वीकार यायेगु जमाना वनेधुंकल धइगु खँ दलतय्सं थुइकेमाः ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
