संविधानसभा भंगया बिचाः
संविधान आयोगं संविधान दयेकेगु ग्वसाः ?
येँ (सन्ध्या टाइम्स)/देय्या राजनीति मेमेगु विषयय् तक्यनाः संविधान च्वयेत समस्या जुयाच्वंगु कारणं आः वर्तमान संविधानसभा हे भंग यानाः न्हूगु निकास मालेगु कुतः जुयाच्वंगु खँ विज्ञ सूत्रतय्सं धाःगु दु। वर्तमान संविधानसभा भंग यानाः चीधंगु 'संविधान आयोग' जक दयेकेगु व वहे आयोगपाखें न्हूगु सविधान च्वयेगुपाखे छपुचः राजनीतिक नेतातय्सं बिचाः शुरु याःगु खँ सूत्रं धाःगु दु। आः संविधान च्वयेगु लागिं मुक्कं न्हय्ला जक ई ल्यं दनि। थुलिया दुने संविधान सभां संविधान च्वये मफइगु जूगुलिं न्हूगु लँपुया रुपय् थज्याःगु बिचाः न्ह्यःने हयाच्वंगु खँ धाःगु दु
।
संविधानसभा भंग यायेधुन कि देशय् राष्ट्रपति शासन लागू याइगु खँ नं सूत्रं धाःगु दु। अथे जुल कि देय्या राजकीय कार्यभार राष्ट्रपति डा. रामवरण यादवया ल्हातय् लाः वनी।
देशय् राष्ट्रपति शासन धाःसां प्रधानमन्त्री धाःसा माधव नेपाल हे जुइ। थथे जुल धःसा प्रम नेपालया शासन नं ताःहाकः जू वनी। उकिं थ्व बिचाःयात एमालें नं सकारात्मक रुपं कयाच्वंगु खँ धाःगु दु ।
माओवादीं थौंकन्हय् यानाच्वंगु आन्दोलन वास्तवय् थ्व अवस्था मवयेके बीगुपाखे केन्द्रित दुगु खँ नं सूत्रं धाःगु दु।
वार्ताय् नागरिक समाज नं माः
माओवादी अध्यक्ष प्रचण्डं थःपिनि आन्दोलनयात समर्थन यायेत नागरिक समाजयात इनाप यानादीगु दु। थौं सुथय् नागरिक समाजया प्रतिनिधितलिसे खँ ल्हासें वय्कलं थ्व इनाप यानादीगु खः ।
खँल्हाबल्हाय् नागरिक समाजया प्रतिनिधितय्सं माओवादीं ल्ह्वनाच्वंगु मुल मुद्दाय् थःपिनि सहमति दुसां राजनीतिक सहमतिं हे समस्या ज्यंकेमाःगु सुझाव बिउगु खः। लिसें आन्दोलनया कारणं हिंसात्मक घटना जुइ मजिउ धासें यदि थुकिं हिंसात्मक रुप काल धाःसा संविधान च्वयेगु ज्या तकं प्रभावित जुइ धकाः नं नागरिक समाजं सचेत याकूगु दु।
लिसें आः राजनीतिक पार्टीया दथुइ वार्ता यायेगु इलय् उकी नागरिक समाजया प्रतिनिधियात नं दुथ्याकेमाःगु माग नं नागरिक समाजं प्रचण्डयात याःगु दु ।
राजनीतिक पार्टीया दथुइ जक वार्ता जुयाच्वंगुलिं निष्कर्ष पिकाये मफुगु खँ धासें नागरिक समाजं थ्व माग याःगु खः ।
