एमालेय् मन्त्रीत आलोचित
सरकारय् च्वनेगु-मच्वनेगु खँय् विवाद
सत्तारुढ पार्टी माओवादीया भातृ संगठनतय्सं देय्या उद्योग स्वास्थ्य साचार आदि ख्यलय् आतंक ब्वलंका-च्वंगु इलय् लाक्क थ्व सरकारय् थःपिं च्वनेगु कि मच्वनेगु धकाः एमालें पुनर्विचार शुरु याःगु दु । थ्वहे झ्वलय् थन न्ह्यानाच्वंगु एमालेया केन्द्रीय समितिया बैठकं सरकारय् च्वनेगु खःसा सरकारं पालना याये माःगु ज्याखँत धकाः थःपिनि बटम लाइन तयार याःगु दु । म्हिगः नीस्वंगु कार्यदलया प्रमुख ईश्वर पोखरेलं तयार याःगु थ्व बुँदात थौं च्वनीगु केन्द्रीय बैठकय् न्ह्यब्वइ । बैठकं पारित यायेधुंकाः थ्व बटम लाइन माओवादी समक्ष प्रस्तुत याइगु खँ सीदुगु दु । छुं जुयाः माओवादीं उकियात पालना याये फइ मखु धाल धाःसा एमालें सरकार त्वःते फइगु खँ सूत्रं धाःगु दु ।
सूत्रया कथं वर्तमान सरकार दुने एमालेया भागय् लाःगु मन्त्रालय व मन्त्रीतय्सं छुं हे ज्या याये मफुगु व अःखतं थ्व मन्त्रालयत लथालिङ्ग जुयाच्वंगुलिं थुकिं एमालेयात बदनाम जक यानाच्वंगु विश्लेषण नं छुं नेतातय्सं न्ह्यब्वःगु खः ।
बैठकय् दकलय् अप्वः उपप्रधान एवं गृहमन्त्री वामदेव गौतमया आलोचना जूगु खः । अथे हे स्थानीय विकास मन्त्री रामचन्द्र झाया ज्याखँ बारे नं आलोचना जूगु खः ।
उखे थःपिंसं पेश यानागु ९ बुँदे मागयात प्रधानमन्त्री स्वयमं वयाः लिसः मबिउतले संसदय् मच्वनेगु धकाः घोषणा यानातःगु नेपाली कांग्रेसं थौं नं सदन बहिष्कार याइगु जूगु दु । प्रधानमन्त्रीया लिसः मवः धासें कांग्रेसं थ्व स्वयां न्ह्यः नं निक्वः सदन बहि-ष्कार यायेधुंकूगु दु । प्रधानमन्त्री प्रचण्डं धाःसा कांग्रेसया माग बारे न्ववाये न्ह्यः कांग्रेस पार्टीलिसे निं वार्ता यायेगु कुतः यानाच्वंगु खँ सीदुगु दु ।
एमालेया थौं च्वनीगु केन्द्रीय बैठकय् महासचिव झलनाथ खनालं संघीय व्यवस्थालिसे ज्वः लाइ कथं पार्टीया सांगठनिक स्वरुप पेश यायेत्यंगु खँ सीदुगु दु । आः पार्टीयात अाचल जिल्ला कमिटीया स्वरुपय् मयंकुसे केन्द्रीय प्रादेशिक व स्थानीय कमिटीया रुपय् विकास यायेगु प्रारुप वय्कलं तयार यानादीगु दु । थ्व प्रस्ताव महाधिवेशनय् नं प्रस्तुत याइ तिनि ।
